Saturday, June 16, 2007

بتسمع اذاعة القرآن الكريم؟؟؟؟ قول بصراحة


النهاردة انا هنقد حاجةعمرها 73 سنة

ولمدة73 سنة الحاجة دى مسخرة فى خدمة بث وأذاعة كلام ربنا سبحانه وتعالى

يعنى اكيد الحاجة دى ليها مكانة خاص جدا وبنحمله كل احترام وتقدير


اكيد معروف انى بتكلم عن اذاعة القرآن الكريم


اللى كلنا سواء كنا بنسمعها او مش بنسمعها حاسين بمكانتها وأهميتها
بس

هل احنا شايفين ان اسلوب وطريقة اذاعة القرآن الكريم
ينفع مع عصرنا ده؟؟
مع كل اسف

انا شايفة ان الاجابة لا
وشايفة انها حصرت نفسها اللى هى القناة فى قالب جامد ومعزول عن تقنيات حلوة تقنيات دى وأساليب الاعلام الجديدة

يعنى مثلا عدم ضم اصوات شيوخ جداد يجددوا دم الاذاعة


طبعا الشيخ الحصرى و عبد الباسط على عينى وعلى راسى ودول اعلام فى مجال الترتيل


بس هل ده يمنع من اننا نستجيب لابسط ضروريات الحياة وهى

التجديد

يعنى تقريبا لو الواحد رجع لسنة 90هيلاقى هما هما نفس الشيوخ
اللى فى سنة95
هما هما بتوع 2000
وهيفضلوا هما هما فى2010



مفيش اى روح تجديد للقناة


مع أن فى اصوات تانية جديدة الناس بتحبها


زى الشيخ محمد جبريل وعبد الرحمن سديس و الحذيفى والعجمى ومشارى راشد وكتير غيرهم



ونيجى بقى على البرامج اللى بيقدموها



يمكن العذر الوحيد للقناة انهم اصلا نشاطهم الاساسى هو اذاعة القرآن المرتل وبس ..والبرامج دى كده بتكون حاجة تخاطيف ما بين كل تلاوة و تلاوة



لكن ده ما يمنعش ان طريقة تقديم البرامج بتاعتهم عقيمة جدا

بداية من صوت المذيعين نفسهم

مش عارفة ليه لما بيتكلموا بيتكلموا بصوت عميق كده او بيتكوا اوى على حروف كلامهم
قال يعنى ده اللى هيزود الروحنيات
وماحدش ينكر ان كل ما لغة التقديم كانت سهلة كل ما ده بيشد انتباه المستمع اكتر ...خاصة ان اهم حاجة فى الاذاعات المسموعة هى ان طريقة الكلام تكون تعبيرية وحماسية عشان يشدوا انتباه المستمع وبساعدوه على تخيل الصورة فى دماغه..عشان مايسرحش

لكن مع الاسف


نادرا ان ماكنش مستحيل لما بلاقى برنامج يشد الواحد انه يسمعه


يعنى انا فى الغالب لما بسمع اذاعة القرآن الكريم بكون وانا فى العربية

واول ما الشيخ بيخلص تلاوة بروح قالبة على محطة تانية


فعلا اذاعة القرآن الكريم محتاجة بلغة الكمبيوتر


فرمتةةةة


اصل ماينفعش تكون الاذاعة الاسلامية الوحيدة اللى فى الراديو على حد علمى ويكون اسلوبها عتيق بالشكل ده


يا اما يعملوا بقى محطة اسلامية تانية فى المشمش ان شاء الله وتكون مواكبة للعصر اللى احنا فيه


يعنى حتى بقية المحطات التانية العادية الحكومية طبعا ..بدءوا يروشوا نفسهم ولو انهم بيبقبوا دمهم يلطش بس بردو اسمهم بيحاولوا يجددوا من نفسهم


لكن بجد الطريقة اللى بيقدموا بيها فى اذاعة القرآن الكريم دى ماترضيش حد


يعنى الواحد يكون ايه شعوره وهو بيسمع راجل بيتكلم بصوت عميق وجااامد وهو بيقول

مع الدووووكتورررة هااااااااجر سعد الديين


كأننا طالعين خناقة مش هنسمع برنامج


وكمان بيجيبوا اناشيد اسلامية بنسمعها بقالنا سنين

مفيش اى تجديد بجد

مفيش حتى برنامج فتاوى عدل


هو برنامج بريد الاسلام أخرهم

مش فاهمة مين اللى لسه لوعايز يسأل فى حاجة فى الدين يبعتلهم على البريد


فى الوقت اللى الفتاوى فيه على الفضائيات تيك اواى

شوية شوية والشيوخ هيعدوا على الناس فى بيوتها ويقوللها مش عايزين تسألوا فى حاجة

الناس من كتر ما خلصت أسالتها فى الفضائيات بقت بتسأل استخسار فى حاجات غريبة

طب والله لقيت قبل كده واحد باعت اس ام اس على قناة اسلامية بيقول هل لبس البنطلون الجينس حرام للرجال!!! مش فاهمة ايه اللى هيحرموا يعنى

ما علينا مش ده موضوعنا

وكمان حتى المواضيع اللى بيناقشوها ...يا اما بينقوا قشور المواضيع ..يا دوب جوانب اجتماعية بسيطة

ياما ينقشوا المواضيع بشكل تقليدى جدا

من عينة ان الاسلام حث على اهمية العمل

وطبعا كله بلغة العربية الفصحىىىى

بالنصب والفتح والضم

وتعطيش الجيم

طبعا انا مش معترضة على اللغة العربية نفسها اللى هى لغة القرآن

انا كل اللى بطالب بيه ان الاذاعة تتكلم بلسان العصر اللى هى موجودة فيه

يعنى الانبياء لما ارسلوا

كان كل نبى بيتكلم بلسان قومه

وحتى انا ماعنديش مانع انهم يتكلموا باللغة العربية و السجع والمحسنات البديعية وكل اللى هما عايزينوا

كل اللى اان عايزاه انهم يجددوا من نفسهم

ويجيوبوا مذيعين جداد ...وياريت لو يكونوا شباب

لأن الشباب اللى هو احنا يعنى ..بلا خيبة بيدوا روح وأفكار جديدة لأى مجال يدخلوا فيه

أتمنى بجد اننا نشوف أذاعة القرآن الكريم بشكل جديد يواكب العصر اللى احنا فيه

وتقدر تجذب الناس ليها

زى مثلا
قناة ال
FM106
بتاعة الأغانى ولو ان ده مش مثل يضرب للمقارنة باذاعة القرآن الكريم قدرت تعمل اساليب جديدة تجذب بيها الشباب للراديو و قدرت انها
تعمل جمهور للراديو من الشباب تانى

Wednesday, June 13, 2007

انا اتجت يا مينزززز

ياااه
الواحد حاسس ان بقاله زمن مادونش
شهر كامل مادونتش بجد اخس عليا
بس انا فعلا كان عندى ظروف
يعنى غير انى كنت بمتحن وانا طبعا والحمد لله من اوائل الطلبة بذاكر اول باول وكنت مقفلة المواد كذا مرة :) عشان كده ماكنتش خايفة خالص خالص من الامتحانات...وماكنتش بروح مطبقة نوم واكل ولا اى حاجة ايه الكدب ده
غير بقى انى كان عندى امتحانات
فرح اختى كان فى وسط الامتحانات كمان:)
ماهى اصلها ناقصة
وقبل ماحد يقولى وايه اللى خلاها تعمله فى وسط الامتحانات
هقولكوا ان ريقى نشف:) بس الحمد لله اهو الايام عدت على خيررررر
الف مبروك يا شيريززززززززدى اختى
وكمان الف مبروك ليا ...امبارح اخدت الاجازة
لولولولولولولولولولولولى
ياه اليوم ده كنت مستنياه بفارغ الصبر
بجد بعتذر لكل الناس اللى انا قصرت فى الرد عليها فى الكومنتس او اتاخرت فى التعليق فى مدوانتهم
يلا بقى بما انى راجعة بعد فترة غياب ولسه مش ماستعدتش مرونة الملاعب قصدى البوستنج
هخلى البوست ده التاج اللى بعتوا ليا شادى
(ربنا يهديك يا شادى ويرجعك عن القرار بتاع التوقف عن التدوين ده اللى انت خدتوا ده )
قولوا امين
انا عارفة ان التاج ده حمض ولف على مدونات مصر على ما رديت عليه
بس يلا شادى اول حد يعبرنى بتاج
ميرسى يا شادى:) اشوفك كده داااكتور اد الدنيا ان شاء الله:)
نبدأ بقى الاسئلة مابقتش احب السيرة بتاعة الاسئلة و الاجوبة و الحاجات دى
احب شخص لقلبك؟
بجد وبدون تمثيل بابا وماما واختى ...دول خط احمر بالنسبالى
انسان مستعد تضحى بحياتك عشانه ركز فى كلمة حياتك؟
انظر اجابة السؤال الاول
بس مش عارفة بقى ساعة الجد هضحى بجد ولا هطبق القاعدة الشهيرة عيش ندل تموت جبان:)
انسان كرهته لدرجة الجنون وتتمنى لو تمسك سكينة وتنقض عليه وتغرزها فى قلبه تقتله وتقف تبص لجثته وتشفى غليل قلبك؟
لا حول ولا قوة الا بالله ....لو كان السؤال لحد كلمة الجنون كان ممكن يبقى ليه اجابة لكن ماعتقدش انى ممكن اكره حد بالشكل ده مهما عمل..وربنا يصفى نفوسنا ويساعدنا نسامح
ما هو اسم آخر اجمل كتاب كتبه بشر وكتبته ومحتفظ به حتى الآن؟
مفيش
اهم جهاز منزلى انت متعلق بيه او بتستخدمه كتير؟
الكمبيوتر وش
مكان تحس بالراحة عندما تدخله؟
المساجد لما بتكون فاضية ومش زاحمة واصلى فيها لوحدى تقريبا
مكان تحس بالراحة النفسية عندما تنظر اليه؟
مفيش....بس ممكن البحر
مكان تحس فيه بالحنين الى شىء لاتدرى ماهو وذكريات جارفة الى لاشىء؟
الشارع اللى كان فيه مدرستى...لما بدخله بفصل عن الدنيا ..كل مكان ليه معنى عندى...وذكريات الشقاوة والبلاوى اللى كنت بعملها وانا صغيرة
اجمل مدينة زرتها داخل مصر؟
شرم الشيخ
اجمل مكان طبيعى رايته فى مصر؟
شرم بردو
شخصية كارتونية تحبها ؟
مارد وشوشنى اللى فى فيلم شركة المرعبين المحدودة و دونالد داك
نوع هاتفك؟
سونى اركسون
سرعة البروسيسور بتاع جهازك؟
يرحمكم الله
حجم الذاكرة-هارد-جهازك؟
الله يسمحك بردو مش هرد عليك
المساحة اللى بتشغلها المواد الاسلامية على جهازك؟
كتيرة ..بس العبرة مش بالمساحة...العبرة بالسماع والاستفادة وانا بصراحة بقالى زمن ماسمعتش دروس فى الدين على الكمبيوتر
نفس المساحة السالف ذكرها فى قلبك-الاجابة لنفسك عشان الرياء يا جماعة؟
الله اعلم
اهم هدف انت واضعه لحياتك الأن؟
بطلت احلم
بس عموما انى اعرف احقق التوازن بين الدين والدنيا ...لا اكون متزمتة ولا اكون بعيدة عن ربنا
كمان نفسى اشتغل فى التحكيم الدولى (اكيد مش تحكيم فى الكورة يعنى)
مواصفات فتاة /فتى الاحلام بالنسبة لك؟
بصوا اصل انا عايزة واحد عمولة ...يعنى ماعتقدش انى هلاقيه...بس اهو كلوا احلام فى احلام
1
يكون متدين ويعرف ربنا ..لا يكون متزمت ولا متسيب
2
يكون شخصية محترمة ويعتمد عليه وناجح فى شغله
3
يحبنى ولو ماحبنيش او الحب راح -كالعادة -بعد الجواز يفضل يحترمنى طول العمر ومايهنيش ابدا
4
يكون اهلاوى اكيد يعنى
يعنى مش معقول مثلا اتجوز واحد زمالكاوى ممكن نخلص على بعض بعد اى ماتش مثلا..او على الاقل يكون مالوش فى الكورة وانا ابقى اسسه على ايدى واخليه اهلاوى
وكمان يرضى يودينى الاستاد ..بابا مش بيوافق خالصصص:( لما بقوله انا عايزة اروح الاستاد يا بابا يقولى انتى اتجننتى يا بت:( اقوله طب هروح ماتش مفهيوش جماهير كتير عشان عايزة اشوف اللعيبة على الحقيقة بردو مش بيوافق
5
يكون دمه خفيف ومش نكدى
شعورك لما بتسمع كلمة مصر؟
عادى ...بفتكر الخيبة التقيلة
شعورك لما بتسمع كلمة يهود؟
عادى بشر...على دين مختلف عن دينى ...لازم نفرق بين اليهود والصهاينة
شعورط لما بتشوف ضابط شرطة؟
عادى بردو...يعنى هعمله ايه يعنى
شعورك لما بتشوف الكناس العجوز فى الطريق؟
بيصعب عليا
افكارك تجه شاب يلبس جلابية بيضاء قصيرة وله لحية وبجيبه السواك ويمسك مصحف فى يده؟
بقول يا بخته متدين ومش همه راى حد فيه وعامل اللى هو شايفه صح...بس طبعا ربنا اعلم بالنوايا
احساس يراودك فى اشارة مرور مغلقة بسبب مرور مسئول كبير؟
بتخنققققققققققق
................................................................................................................
رجاء خاص يا جماعة ..دلوقتى انا عايزة اكتب بوست و عايزة احط معاه تسجيل عندى ريل بلاير صوت بس...طبعا انا محدثة بلوجات ...مش عارفة اعمل اى حاجة ولا حتى عارفة احط اغنية للبلوج ولا السايتات المهمة...احم احم ادى اخرة النت المجانى بقى اللى خلانى اقعد على النت..مالينا البلد انا عارفة:) ..وماحدش يقولى غيرى البلوج للكلاسيك مود واشتغلى بالاكواد والحاجات العجيبة دى....انا عايزة حاجة سهلة ...بليز يا جماعة ابقوا قولولى فى الكومنتس الطريقة انى احط مع البوست اللى انا عايزاه ده..واللى يدخل ولقى حد سبقه وقالى مايستخسرش ويشرح تانى ..التكرار يعلم مين؟؟؟اكيد الشطار..ومانجلكوش فى حاجة وحشة