Thursday, July 26, 2007

زغروتة حلوة

اليكم هذا النـــــبأ الهام
انا نجحت يا جدعااااااااااااااان صافىىىىىىىىىىىىىى
بس لسه مش عارفة التقدير ايه ...اصلى جبتها من الكنترول
لولولولوووووووووووووووووووووووووووولى
الف حمد وشكر ليك يارب
يا ربنا لك الحمد كما ينبغى لجلال وجهك و عظيم سلطانك
انتهى البيان

Saturday, July 7, 2007

التعليم المجانى وسنينه


"انت تعليمك مجانى يا بنى"

"يخرب بيت مجانية التعليم اللى ناطتك علينا"

"يادى مجانية التعليم اللى كلت دماغك"


جمل بنسمعها كتير لما حد المفروض انه متعلم يغلط فى كتابة كلمة
او يكون جاهل بمعلومة من المفروض انو يكون عارفها

وعشان كده انا النهاردة هتكلم عن مجانية التعليم

قبل اى حاجة
احب اعرفكو بنفسى
انا نرمين ...مصرية وابويا مصرى على رأى نانسى عجرم

وواخدة الثانوية العامة المصرية

ودخلت جامعة مصرية حكومية مية فى المية

عشان انا اصلى زقهت وطهقت من حوار مجانية التعليم ده

كل ما ادخل فى مناقشة مع حد خصوصا لو كان اشتراكى ناصرى

بيطلعنى انى جاحدة وانى واكلاها والعة.. وشوية شوية يحسسنى انى عميلة لبوش

عشان كده احب ان اؤكد واعلنها وبكل صراحة انى ماليش اى انتماءات او ميول

يعنى انا لا ناصرية ولا سادتية (نسبة للسادات) ولا ...ولا بلاش

عشان كده انا بقول رايى بشكل مجرد

سواء كان ليا مصلحة فى مجانية التعليم ولا لا

انا بتكلم عن فشل او نجاح النظام ده

ومن هنا السؤال الاساسى لموضوعنا

ايه رايك فى مجانية التعليم؟؟

قبل اى حاجة

انا طبعا اؤيد وبشدة مجانية التعليم المدرسى

لان مصر مش ناقصة جهل و تخلف

ونكفى ان نقول ان الامية عندنا واصلة ل 17 مليون

لكن انا بتكلم دلوقتى عن مجانية التعليم الجامعى
ومن هنا هنسأل سؤالين

اولا
هو فعلا التعليم الجامعى مجانى ولا لا؟؟
ثانيا
هو احنا لازم كلنا نبقى خريجين جامعات؟؟

نمسك اول سؤال اللى هو.. هو التعليم الجامعى مجانى او لا

معظم الكليات الحكومية بتكون مصاريفها حوالى 100 جنيه وعلى الرغم من ضآلة البملغ بيكون فى كتير من الحالات مش فى استطاع الكتير من الطلبة انهم يدفعوه


لكن بذمتكو كده هل معنى ان المصاريف مش بتزيد عن ال100 جنيه دى؟؟

ده طبعا غير ثمن الكتب

هى دى الفلوس اللى بس بتدفع؟؟

يعنى مش بيكون فيه مافيا الدروس والكورسات

وبيزنس الملخصات والمراجعات النهائية

ومراجعة ليلة الامتحان

ومراجعة فجر ليلة امتحان

ومراجعة بعد الامتحان

مش كل ده بيسف فلوس اد كده من الطلبة

وفى الاخر الاستفادة بتكون ايه؟؟؟


هرد على السؤال ده كمان شوية

نيجى بقى عند تانى سؤال

كان ايه؟

اه

هو احنا لازم كلنا نكون خريجين كليات؟؟

بصوا يا جماعة بصريح العبارة كده

مش لازم كلنا نكون خريجين كليات

قبل ما حد بس يهب فى وشى ويقولى حرام عليكى و يركبنى ذنوب وانا قاعدة

هساله سؤال

هو فى حاجة جابت البلد دى ورا اكتر من انها بلد شهادات؟؟؟

يعنى اعتقد شاع اوى بين الناس انهم يقولوا انا اصلا مش هاممنى الكلية المهم اخلص وخلاص
واخد الشهادة واروح الحتة الفلانية او اهج على بره واشتغل اى حاجة

او مثلا البنت تقول انا عايزة اخلص واخد الشهادة و اتجوز واقعد فى البيت

يعنى هما واخدين الجامعة دى كده مجرد وجاهة و مركز اجتماعى و خلاص

مش مهم بقى الامكانيات المحدودة

مش مهم انه ده بيكلف الدولة فوق طاقتها

دى امريكا بجلاله قدرها و الفلوس اللى على قلبها مش مخلية التعليم مجانى

مش مهم انهم بيخدوا مكان حد كان عايز الكلية فعلا وده كان امل فى حياته
مش مهم اى حاجة

طالما هو حقق اللى فى دماغه و خلاص

وبعدين ماحدش ينكر ان موضوع حمى الشهادات ده اللى بقى سائد فى المجتمع خلانا نحتقر المهن
اللى بتعتمد على الحرف

مع ان بره فى الغرب عندهم المهن الحرفية دى عادى...مهنة زى اى مهنة

هنا بقى تكون البنت خريجة تجارة مثلا وتلاقيها و جالها اى حد يتقدملها
مش معاه شهادة بس صاحب حرفة معينة اى كانت

تتأمر عليه وتقول لا لا ماقبلش

انا عارفة ان انا لو مكانها كنت بردو هرفض بس انا بتكلم عن ثقافة مجتمع اللى انا جزء لا يتجزأ منه

وتغيير ثقافة المجتمع دى بتكون محتاجة وقت طويل

يعنى احنا عايزين الناس كلها

تبقى مهندسين محاميين محاسبين ودكاترة


بالرغم اننا لا يمكن نستغنى عن بقية الحرف والمهن


وبعدين نيجى بقى نشوف عواقب اننا كل الشعب يكون خريجى كليات

كلية مثلا زى كلية حقوق او طب

كل سنة بيخرجوا الالاف من المحاميين والدكاترة

الالاف مآلفة هى مآلفة بتتكتب كده؟؟ يقطع التعليم المجانى

يعنى بمعدل محامى ودكتور لكل مواطن

هل يعقل ان كل دول لما يتخرجوا هيلاقوا شغل يستوعبهم كلهم

اكيد بقى لازم معيار المفاضلة بينهم هيكون لمعايير شخصية مش موضوعية

كوسة بقى و خضار و كده

طيب نيجى بقى لمستوى التعلم نفسه
اظن ان الكل متفق معايا ان غلطان و ستين غلطان اللى ييقول على مستوى التعليم فى مصر
ردىء او دون المستوى
وده طبعا لان مفيش تعليم اساسا
احنا بناخد حاجة زى ديمو التعليم
عارفين كده الجيمز اللى بتكون جيالك ديمو ..عشان تشوقك وتشترى الجيم
اهو بالظبط احنا بناخد ديمو المناهج
كله حشو حشو و نظرى نظرى
الواحد يصم الملخص
ويدخل الامتحان ...يلاقى الحتة اللى هو منشن عليها جت
يحمد ربنا
ويبدا بأول سؤال
اطرش ما تعرفه عن
واكيد لما الدكتور يقولك فى الورقة
اكتب بايجاز
تعرف ان ده كمين
وانك المطلوب منك 30 صفحة على الاقل
وفى الاخر اراهن ان الواحد بيفتكر 20 % من اللى دحه و حفظه بعد شهر واحد من الامتحان
ده اذا ماكنش بعد الامتحان
فعلا زى ما قال خالد كساب قبل كده
16 سنة تعليم الواحد بيخرج منهم زى اللى خارج من سجن طره مايعرفش اى حاجة عن العالم الخارجى
طب وبعدين يا جماعة
ايه الحل فى اللى احنا فيه ده
محمد على لما جه مصر و اتولى الحكم اهتم بالتعليم اهتمام كبير
وعمل حاجة اسمها الهرم المقلوب
يعنى اهتم بالكبير قبل الصغير ...عشان مايضطرش يستنى سنين على ما يطلع جيل بيفهم
مع الاسف احنا لحد دلوقتى لسه مقلقين و بنعمل لجان تنبثق منها لجان تنبثق منها غرف طوارىء
عشان نقدر نكرر
نحط سنة 6 ولا نشيلها
حاجة تكسف
اتحدى ان فى برنامج توك شو فى العالم بيعمل حلقة عن الثانوية العامة غير البرامج المصرية
طيب دلوقتى هنيجى للسؤال الجوهرى
ايه الحل
طبعا انا لو قلت اننا نشيل مجانية التعليم الكل هيقوم عليا وهتعلق على باب المدونة
وهتعدم رميا بالكومنتس
مش هقول نعمل زى بره و نخلى المجانية مقتصرة فقط على المتفوفين و اللى عايز يدخل غيرهم يبقى يدخل حسابهم
وساعتها التعليم هيبقى تعليم على اصوله ..مش هيكون فى حاجة اسمها صم و حفظ ..هيبقى كله فهم و تشغيل دماغ و فيه تعامل مباشر بين الطالب الدكتور...والدكتور يعرف كل طالب فعلا بالدرجة اللى يستحقها...مش تعدى 4 سنين و الطالب مش عارف الدكتور ولا الدكتور عارف الطالب
انا كل اللى بطلبه
اننا مثلا نخلى اللى يسقط ويعيد السنة يتحرم من المجانية

مع احترامى لكل اللى دبلروا ...واللى انا شكلى كده هكون منهم السنادى ربنا يستر:( النتيجة قربت
ماهو اصل الموضوع مش فسحة رايح جاى من الكلية
وليه تسقط مرة اذا كان ممكن تسقط مرتين
انا عارفة ان الموضوع ملعبك
ومش سهل على الناس انها تتقبله
بس بجد هنعمل ايه
ما هو اللى احنا فيه ده حرام بجد
لو عندكو حلول ماتتكسفوش وقولوا فى بيتها يعنى
**********************************
انا بعتذر عن تأخرى عن الكتابة وتاخرى فى الرد على الكومنتس و كمان التعليق فى المدونات .
بس الواحد اليومين اللى فاتوا دول كانت نفسويته تعبانة شوية و كمان كان النت فيه مشاكل
صحيح يا جدعان انا بقيت بكتب فى مدونة الاهلى
مع تيم جامد جدا
ابقوا تعالوا