بلا ايجابية بلا بتنجان مقلى

طبعا انا عارفة ان البوست ده متاخر شويتين تلاتة عشان كان المفروض اكتبه يوم الاستفتاء او قبله .بما انه بيتكلم عن الاستفتاء...لكن واضح انه بوست نحس كل ما اجى اكتبه مش عارفة ايه اللى يعطلنى واروح مش مكملاه(يمكن الوبست نفسه قرفان من الموضوع)المهم ما علينا...طبعا لو حد كان متابع البرامج المصرية (الحكومية) اليومين اللى قبل الاستفتاء كان هيلاقى فى وشه برامج بتتكلم عن التعديلات العظيمة و البوابة اللى احنا بنعبرها (بتاعة المستقبل دى)واننا لازم نقول نعم للديموقراطية و نعم للرخاء و الهطل ده....اما بقى البرامج الفضائية فهى اتكلمت على الموضوع على الحياد..وافتكر انى كنت بتفرج على برنامج 90دقيقة ولاقيت المذيعة مى بتسال معتز بتقوله : انت هروح يا معتز الاستفتاء قالها: انا عن نفسى مش بحب السلبية وهروح...

ومن هنا السؤال...هل اللى ما يروحش الاستفتاء يبقى سلبى؟؟؟؟؟

ج-انا شايفة ان الاجابة انه واقعى اكتر ماهو سلبى...ماهو اصل يا جماعة احنا مش هنشتغل بعض ونقول ان حد فينا مصدق ان الاستفتاء ده نزيه وان نتايج التوصيت هتكون نزيهة بردو...الكلام ده الواحد يسمعه فى برامج الحكومة(البيض بيضك-التعبير مأخوذ عن خالد كساب)

عارفين السنة اللى فاتت ..ايام الشوطة بتاعة الانتخابات الرئاسية...انا بقى كانت واخدانى الجلالة...وقلت لازم اروح عشان ابقى عملت اللى عليا وبتاع...وياريتنى ما اخدتنى(الجلالة)...اتشحطت يومها...اول حاجة روحت القسم قالولى انت تروحى مدرسة عباس العقاد هى المنطقة بتاعتك روحت المدرسة (بالصدفة كانت مدرستى فى الاصل)دورت على اسمى مالقتهوش...قالولى روحى مدرسة مش عارفة باين السيدة خديجة (والله ما فاكرة الاسم)..وروحت المدرسة اللى قالولى عليها...وهناك لاقيت بنات كتير ادى...قلت طب الحمد لله اكيد الواحد هيلاقى اسمه...و الحمد لله مالقتش حاجة...المهم وانا واقفة جوا والمكان كله ظباط و كده كانت واقفة جنبى بنت من سنى..كانت بردو بتشوف اسمها...فانا حاولت اشد كلام معاها اهو الواحد يسلى نفسه بدل اللطعة اللى الواحد فيها دى...سألتها (وياريتنى ما سالتها) انتى بقى ناوية تنتخبى مين :ي:ي (وعلى وشى ابتسامة بلهاء)...لاقيت الاجابة بتقولى حسنى مبارك...انا بقى (وش مبلم )قلتلها احنا ضعنا...لاقيتها (بابتسامة واثقة بتقول: بالعكسسس...وقتها جه فى بالى حاجتين...اول حاجة المكان كله ظباط:)...مفيش وقت للعواطف يعنى اى كلمة هتفلت منى هيعلقونى على طول على باب اللجنة...وانا جبانة اوى ومع اول قفا هبيع القضية...قلت يا واد طنش خالصصصص....وتانى حاجة جت فى بالى ...اعلان دعاية مرشح الحزب الوطنى(انا ماجبتش سيرة حد) بتاع مشروح الالف مصنع و الالف مدرسة وعرفت ليه البنت واثقة من اجابتها...البت يظهر كان واكلها العشم ان احفادها يلحقولهم مكان فى المدرسة و كده...المهم ويارب فى الاخر المشوار جه بفايدة...بردو فى الاخر مالقتش اسمى..ومن ساعتها وانا قررت اقاطع اى حاجة فيها اخد رأى وتصوت و كده..الغريبة بقى ان بعدهابكام يوم حصل حاجة....فعلا ماكنتش على بال خالص...وكانت مفاجاة بالنسبالى و اكيد بالنسبة للجميع...المفاجأة ان مرشح الحزب الوطنى هو اللى كسب:):):)شوف البت كان عندها بعد نظر ازاى.....يلا بقى احب اختم بآية جميلة بتصبرنى على اى حاجة فرسانى فى الدنيا دى بصراحة انا مش فاكراها اوى...بس ده معناها ..ولا تحسبن الله غافلا عما يعمل الظالمون

للمرة المليون بتأكد ان انا ممكن اكون جوايا 5000 الف حاجة متناقضة فى نفس الوقت...يعنى ممكن اكون بكره حاجة و افضل طول مانا قاعدة اقول انى بكرهها وفى الاخر لما تروح منى او تبعد عنى احس انى تعبانة اوى من غيرها..والعكس صحيح ساعات بكون فاكرة انى بحب حاجة وان حياتى من غيرها مش هتمشى وفى الاخر الاقيها حاجة ولا تستاهل (على راى شيرين:غلطت مرة وقلت على الرخيص غالى..المهم ما علينا)...وانا اللى حصل معايا المرادى هى الحالة الاولى ..اللى حصل انى كنت مشتركة فى موديل الامم المتحدة اللى فى جامعة القاهرة(مش عايزة حد يطلعلى فى النص كده ويقولى يعنى ايه موديل ...طب خلاص هقول بسرعة يعنى ايه موديل ..الموديل ده بيكون كده نشاط بيكون هدفه ان الواحد يعرف المنظمات ماشية ازاى ..يعنى مثلا فى موديل مجلس الشعب يخليك تعرف ازاى مجلش الشعب بيناقش القوانين وازاى بيتم التصويت ...وفى موديل الامم المتحدة(وده اللى كنت انا فيه)وفيه الواحد شاف نموذج مصغر من اللى بيحصل فى الحقيقة فى الامم المتحدة وازاى بتم مناقشة القضايا..اظن كده عدانى العيب بعد هذا الشرح الوافى ..كنا بنقول ايه بقى :ي)

المهم انا بصراحة كنت كارهة الموديل ده جدا(معرفش ليه) وكنت بحلم باليوم اللى اخلص منه..يمكن عشان طبيعة الناس اللى فيه بتختلف عن طباعى مش معنى كده انى صح وهما غلط او العكس ..لكن اللى اقدر اقولوا انى على طول كنت حاسة انى مش مرتاحة معاهم...وكنت فاكرة انى لما اصدق والموديل يخلص..وفعلا الموديل خلص..بس مش عارفة ليه مش حاسة انى فرحانة انو خلص بالعكس انا قاعدة افكر..الموديل ده كان مش بالوحاشة اللى انا كنت مصوراها لنفسى ...الناس اللى فيه اينعم هما مختلفين عنى...بس فى الاخر اتعودت عليهم وعلى طريقتهم ..ليه انا كنت عازلة نفسى بالصورة دى كده!!! اما انا انسانة غريبة فعلا...يلا ماحدش بيتعلم ببلاش وعلى العموم وصف حالة الاكتئاب اللى انا فيها دى بيسموها (Pcd)

post conferance depression اللى هو اكتئاب ما بعد المؤتمر...يلا على العموم انا طلعت من حوار الموديل ده انى ادى فرصة لنفسى احكم على الحاجة و كمان مش معنى انى الاقى حد مختلف عنى انى انكمش و اخاف و احس انه مش هيحبنى واحسس نفسى بالعزلة.

وما البنى ادم الا بالونة كبيرة!!!!!

السلام عليكم ورحمة الله وبركاته

طبعا انا عارفة انى من يوم الافتتاح وانا غايبة وده خلى زوار مدونتى الجديدة متشوقين ليا اوى(خليها فى سركو) بس انا احب اقول بس سبب الغياب و السبب ده هو اللى هيكون شرح للعنوان بتاع البوست ..اللى حصل ان اعز اصدقائى(هبة) تعبت نفسيا اوى اليومين اللى فاتوا..وطبعا انا كنت زعلانة عليها اوى طبعا من الممكن حد يقول ان البت دى(هبة يعنى) فافى و كده ..لا لا يا جماعة هبة دى كده زيى جامدة ومش بتتهز بسهولة وبتضحك وتهزر و قلباها مراجيح على طول..بس اللى حصل ان احنا بشر فى الاول و الاخر..لينا طاقة لما الحمل بيزيد علينا بنفصل زى الكمبيوتر لما بنزود الحمل عليه بيهنج ...اهى صحبتى كده بالظبط ...حضرت 3 عزاء فى اسبوعين و هنجت بعدها...بجد البنى ادم ده بؤ على الفاضى ..وبالونة كبيرة اى حاجة تيجى جنبه يفرقع...يلا ما علينا سورى انى كنت قلبتها حزن النهاردة وزهد..بس ان شاء الله بعد كده اغير اللون الغامق ده:ي وابدا اتكلم فى مواضيع بجد...ادعو لهبة و لينا اجمعين

والسلام ختام

بسم الله الرحمن الرحيم و هنبدا الليلة :ي

طبعا بما ان انا بس اللى موجودة دلوقتى فى حفل افتتاح مدونتى الجديدة...فاحب اقول لنفسى الف الف مبروك يا نرمو (نرمو اللى هى انا )..وبما ان انا الحاضرة الوحيدة..فانا بتعهد قدام نفسى ان البلوج ده هيكون منبر (حلوة منبر دى:ي)لاى حد تايه ونفسه يلاقى حتة يتوه فيها اكتر..وبما اننا فى عصر الديموقراطية واهو خلاص على وشك العبور البوابة بتاعة المستقبل فاى حد نفسه يقول حاجة ...حتى لو كانت بتنتقدنى انا سخصيا:ي يقولها ورزقه على الله... بس اهم حاجة ان النقد مايتجاوزش حدود الادب يعنى من غير شتيمة (ضرب بس:ح)......هذا واقول قولى واستغفر الله لى ولكم و السلام عليكم ورحمة الله وبركاته

"تصفيق حاد"