Wednesday, May 9, 2007

نزاهة مش ميد اين ايجيبت

على الرغم من انى كنت ناوية ماكتبش حاجة جديدة طول الشهر ده ..يعنى زى ما الكل عارف شهر امتحانات والواحد وراه تلاااااااااال من المذاكرة ..يعنى مش وقت الواحد يبوست
ينشر بوست يعنى
تعبير مأخوذ من نهى منير
خالصصصصصص
بس بصراحة لقيت كده خبرين وقعوا قدامى ماقدرتش اقاوم فكرة انى اكتب بوست صغنن عنهم
انتو عارفين بقى يموت البلوجرى وصوابعه بتلعب على الكيبورد

فى الحقيقة الخبرين اللى معايا النهاردة منفصلين عن بعض..بس بيشتركوا فى حاجة ...ان الاتنين بيتكلموا عن نزاهة القضاء
اكيد مش قصدى القضاء المصرى...طبعا قضائنا نزيه على عينى وعلى راسى ..بس بردو طلع ولا نزل نزاهة مصرية
يعنى فيها الديفو بتاع اى حاجة ميد اين ايجبت
اول خبر معايا بيتكلم عن باريس هيلتون...البنت دى مليارديرة وريثة فنادق هليتون.... دى بقى اتحكم عليها فى امريكا بالحبس 45 يوم
؟؟؟لييييييييييه
!!!عملت ايه البنت دى
عشان كانت سايقة العربية وهى مخمورة ودى مش اول مرة ليها
عندنا فى مصر لو ابن رجل اعمال او وزير عمل مصيبة بالعربية بتاعته وقتل حد...هيطلع منها زى الشعرة من العجينة...وكله بفلوسه......لكن باريس دى معرفتش تعمل حاجة بفلوسها توقف بيها حكم القضاء اللى صدر ضدها
مع ان باريس دى لو مثلا فى بلد زى اى بلد من بلاد العالم التالت حلو التمويه ده كان فى ايدها تشترى السلطة القضائية ولموآخذه التشريعية
بلاش التنفيذية بفلوسها

تانى خبر بقى معايا ده يفقع بصراحة ..يقولك فى النرويج مواطن اسمه رونى بار هانسن
ماله بار هانسن ده؟؟
يقولك رفع قضية عشان كان عايز يترشح لمنصب قاضى وتم تجاوزه
عارفين ادوا المنصب لمين ؟؟
لواحدة ست اقل تأهيلا
طب هما الناس دول زى عندنا كده فى كوسة والخضروات اللى عندنا دى
لا يا جماعة القانون عندهم بينص على ان المراة لازم تمثل 40%على الاقل من اعضاء مجالس الادارة بالشركات
طب طالما هما فل اوى كده ...مايرفضوا دعوى رونى ده
تصدقوا ان عمونا رونى ده اتحكملوا ب 117 الف دولار تعويض
مش عارفة ليه مش 120 الف ويخلصوا ...ما علينا حد لاقى
اللى يفقع بقى ان عم رونى ده رفض التعويض وقال ان الوظيفة عنده اهم من المال
فى الحقيقة الواحد مش عارف يقول ايه.
على فكرة البلدين دول ماحدش يقدر يقول انهم بلاد كاملة وبتحقق العدالة بشكل مجرد...يعنى اكيد
كلنا عارفين سياسات امريكا الخارجية عاملة ازاى...وبلد مثلا زى النرويج دى كانت من اكتر المؤيدين لموقف الدنمارك ايام ازمة الرسوم المسيئة للرسول عليه افضل الصلاة والسلام بل انها كانت من البلاد اللى بتسىء كمان....لكن انا باصة انهم اد ايه عادلين جدا مع شعوبهم ومش بيكيلوا بمكيالين زى عندنا مع شعوبهم...عشان كده هما وصلوا للى هما وصلوله دلوقتى.. على فكرة النرويج دى الاحصائيات بتقول انها متصدرة قائمة افضل دول العالم من حيث مستوى المعيشة


Saturday, May 5, 2007

تابع ال ج 2 من "الشات و آخره"....حـب الشات = صبـــــــــــاح الاشتغالات


زى ما قلت فى الجزء الأول من البوست.. ان حب وارتباط الشات ده هو أخطر ما فى الشات
.طبعا قبل ما ابدأ كلام فى الموضوع ده احب اقول انى هطبق القاعدة البرلمانية الشهيرة اللى بتقول

النائب تحت قبة البرلمان يمثل الأمة كلها

وقياسا عليها بقول انى تحت قبة هذا البلوج امثل البلوجرية كلهم دون تمييز بين ولاد و بنات ...

يعنى ان شاء الله هكون حيادية وانا بتكلم فى الموضوع ده


فى البداية احب اقول ان طبعا العلاقات الانسانية معقدة وصعب ان حد يحطلها قواعد ..يعنى ماينفعش اقول ان لو توافرت ظروف معينة بيحصل حب او كره بين الناس ...لان دى حاجة معايرها وضوابطها فى ايد اللى خلقنا وحده(سبحانه وتعالى)

يعنى مثلا لما انا اجى اقول ان حب الشات صباح الاشتغالات ..اكيد فى ناس هتقوم عليا وتقولى لا الحب موجود فى كل مكان وزمان وانه مش بيعرف بالمسافات و الشويتين اللى بنسمعهم فى الافلام والمسلسلات اللى كلت دماغنا ..طبعا مش قصدى انهم غلط وانا صح وانى خلاص ادركت الحقيقة المطلقة

لكن لما نيجى نطبق ده على الواقع

.هنلافى ان مفيش حاجة اسمها حب بجد من النت


.يعنى انا لما بقول كده لأى حد.. بيقولى لا فيه.. ويقولى انا اعرف ناس كتير حبوا بعض من الشات و اتجوزوا

(لكن انا شخصيا عمرى ما شفت قصة نت كملت للآخر)


يا ريت يا جماعة لو حد شاف (بعينه) تجربة نت كملت يقولى


وحتى لو افترضنا (جدلا) ان فى اتنين حبوا بعض بجد (جدلا) والولد راح طلبها من اهلها (جدلا بردو)...

اولا هيكون ايه رد فعل الاهل ؟

ثانيا لما ان شاء الله يتجوزوا ويخلفوا الراجل هيقول ايه لولاده

!!!انا عرفت ماما من الشات


طبعا كل ده بافتراض حسن نية الطرفين

ولو انى مش بالعة اوى ان اتنين يحبوا بعض من غير مايشوفوا بعض ويحسوا ببعض ..وبلاش بقى الحوار بتاع توافق ارواح وبتاع احنا مش بنحضر عفاريت هنا ..ده ارتباط.. يعنى قبول الشخص بكل تفاصيله بشكله ...بطريقة كلامه...ردود افعاله..تعبيرات وشه...مش مجرد سطور


نيجى بقى لموضوع الاشتغالات

ما اكتر الاشتغالات على النت ...سواء من ولاد او بنات ..وطبعا مش موضوع انى متحيزة للبنات اكتر.. لكن اكيد لا يخفى عليكم ان الولاد هما المتفوقين اكتر فى المجال ده ..بحكم انهم الاكتر عددا فى الشات وكمان الولد بيكون عنده المقدرة انه يحب مية مرة او بمعنى ادق يشتغل اكتر من واحدة من غير ما الموضوع يأثر فيه اوى.. واديه بيتسلى.. هو حد وراه حاجة.....بس ده ده مايمنعش ان فى بنات لعنةةةةةةةة تشتغل 50 موقع شات بحالهم من غير ما يطرفلها جفن


طب نبدا الاول باشتغال البنات للولاد


كان فى كلام لذيذ اوى كان كاتبه ولد عن بنات الشات فى منتدى ..وكان مقسم بنات الشات كذا نوع ...وكان من ضمن تقسيماته

نوع اسمه اوحى

:هحاول افتكر نص كلامه (والكلام على لسانه)

البت تكون بتكلمك وبتكلم اخوك وأبوك و بتكلم عيلتك كلها... وتقولك ده انا ماليش غيرك... انا بدخل النت عشانك ده انت اوحى اوحى اوحى ..اللهى تطلع اوحك يا رب

بصراحة الولد ماغلطش وفعلا فى بنات بتعمل كده وبالنسبالها الموضوع تغيير روتين وكسر ملل...ولما تحب تقلب صاحبنا.. يا اما تحور عليه وتقوله انا جالى عريس ..أهلى عايزين يجوزونى غصب عنى ...انا هموت من غيرك انى راحلة...بلاش تعلق نفسك بيا انا انسانة تعيسة.. الوداع يا اجمل حب ضاع

بس ده مايمنعش ان ساعات بتكون البنت مضغوطة فعلا وبتكون مظلومة

...يا اما ترزع صاحبنا بلوك غلس او ديليت رخم من ليستة حياتها كلها..


نيجى بقى لاشتغالات الولاد للبنات (ومع الاسف دى اللى بتكون الاكتر خطورة)

كل ولد لازم يألف قصة حب فاشلة مر بيها سابت فى نفسيته جرح عميق صعب ان يندمل... وانه معذب فى الأرض وشايف الحياة سودة....اوبا ..آآآن آآآن أأأأأأأاااان ...اتكلم مع الزبونة(البنت اللى بيشتغلها)...ويحكلها عن تجربته الصعبة ...والبنت تحس انه حساس خالص خالص وأنه مش حمل جرح تانى...وبعيدن يبدا يحسسها ان حياته اتغيرت من ساعة ما عرفها...وان شمس حياته اشرقت من جديد وان البسمة رجعت على وشه

ويحسسها انه بيخاف عليها و بيغير.. ويقولها ماتلكميش حد.. ما تدخليش شات ويعمل نفسه ابو العيال وطبعا البت بتبقى هابلة وعايشة الدور
(وماتعرفش ان تحكمه ده، مش حب فيها .. ده حب تملك مش اكتر وكمان عشان يعيشها الدور)
وفى الآخر يديها استمارة 6 ...ياما يقولها انا حاسس انى ماستهلكيش والكلام المألوف ده لما حد يكون عايز ينطر حد ...او يكون بجح ويقولها انا مش بحترمك ازاى اثق انك مش هتعرفى حد تانى غيرى وانتى ازاى تصدقى واحد لا شوفتيه ولا تعرفيه مش جايز اكون انا انسان وحش..وياريت الموضوع موضوع كسر قلب وخداع فى المشاعر وبس..الموضوع ممكن يمتد بعد كده بتهديد فى السمعة ويعملها مشاكل كتيرة فى حياتها

والله انا لسه قارية تحقيق فى الموضوع ده .. ان مرة واحد اخد صور واحدة كان مرتبط بيها من الشات وهددها بيها وهى ما ستجبتش للتهديدات ديه ..واتجوزت حد تانى وبعد كام سنة الولد ده راح ورا صورها لجوزها

وطبعا النهاية معروفة

وطبعا كتير من البنات مايعرفوش ان الدنيا اتقدمت وان ممكن صورتها تتاخد من غير ما تحس...او ان فى برنامج بيفتح الكاميرا من غير ما تشغلها وبلاوى تانية كتير

فى ناس هتقولى ...بس ده مايمنعش ان فى ناس كويسة ومش كل الناس وحشة على الشات

هسالهم سؤال ايش ضمنكوا ...ايه المعيار اللى على اساسه هتحكموا بيه على ناس كل اللى انتو متاكدين من بيانتهم النيك نيم بتاعهم

انا عارفة ان كلامى مش هيقدم ولا هياخر....وان حتى لو فى حد مرتبط بحد على النت وقرا كلامى ده ..هيدخل كلامى من ناحية ويطلعه من الناحية التانية...طبعا انا اتمنى ان كل الناس اللى بتحب بعضها تتجوز وتعيش حياة سعيدة ...بس انا كل اللى بترجاه منهم ان فى حالة(بعد الشر) فشل الموضوع للاسباب اللى انا قلتها دى يجى هنا ويقولى

والى كل المشتغلون(اللى بيشتغلوا الناس يعنى) اتقوا الله بقى..كما تدين تدان...ولو كنتو عندكو فراغ اوى كده

(زى ما احنا كلنا عندنا فراغ قاتل)

اعملوا اى حاجة تانية غير اشتغال الناس


Tuesday, May 1, 2007

الشات و آخره.......الجزء الأول




اى حاجة فى الدنيا سلاح ذو حدين... ممكن الواحد يستخدمها استخدام كويس وممكن يستخدمها استخدام وحش...عندنا فى مصر فى الغالب بنختار الاستخدام الوحش او على الاقل بندور على اتفه استخدام ليها ونعمله...زى الموبايل الاختراع ده اول ما تعمل بره كان معمول بره عشان الناس تجيب بعضها بسهولة ويخلصوا الشغل اسرع لكن عندنا الاصل اننا ماسكين موبايلات عشان نشوف مين حاطط رنة تامر والكليب بتاع نانسى ومين اللى منزل نغمة باسمه وبقينا شعب مقضبها رنات ومين اللى بيتصل عشان يسمع احلى افهات الافلام
الدكتور زويل بيقول انه لما جه مصر فوجىء انه متأخر اوى اوى فى موضوع الموبايل ده

نيجى بقى لحاجة زى النت ...طبعا بره هما مش ملايكة ..يعنى هما كمان ليهم استخدمات وحشة للنت يمكن اكتر مننا لكن بيستخدموا النت فى الغالب فى الحاجات اللى تفيدهم ...وبتكون الاستخدامات التافهة
(زى الشات و المواقع اللى مش ولابد )
فى الويك اند او على الاقل مش وقت الشغل...لكن ولله الحمد ..عندنا هنا الاصل التفاهة و الاستثناء لما نعمل حاجة مفيدة على النت..يعنى مشهد الموظف اللى قاعد على مكتبه وفاتح سوليتير وبيلعب بقى مشهدعادى ومألوف جدا ومابقاش ظاهرة تستحق الدراسة
المهم انا كلامى النهاردة هيكون عن الشات اللى اعتقد انه السبب الرئيسى فى استخدام 90% من شباب الشعب المصرى
(طبعا الاحصائية دى طلعة من مركز نيرمين للبحوث والاحصاء والتعبئة ..يعنى احصائية مضروبة بس ماعلينا)
بس انا يعنى بتكلم بلسان الواقع
الشات نفسه كفكرة مجردة فكرة غرضها مفيييييد جداااا
وهو ان الشعوب تعرف بعضها و تبادل الثقافات (الى اخر هذا الكلام الحمضان) وان العالم بقى قرية صغيرة ومش عارفة ايه... واكتر حاجة بتساعد على انتشاره هو انه رخيص ومش بيكلف حاجة ...ييعنى بقى الواحد يكلم عمه اللى فى امريكا صوت وصورة ...وفعلا دى حاجات احنا محظوظين اننا اتوجدنا فى زمن زى ده
بس
وآه من كلمة بس
هل انتو شايفين اننا (كشعب مصرى وعربى)بنستخدمه عشان كده بس ولا عشان حاجات تانية
اكييييد عشان الحاجات تانية


على فكرة انا فى البوست ده مش برتدى عباية الحكمة وجاية اقول ايه الصح والغلط
انا كنت قبل كده مدمنة شات ، كنت بعمل شات مع طوب الارض ملحدين متدنين مصريين اجانب ..جربت اعمل فيها عاقلة ورزينة واتكلم فى الدين او فى السياسة واجادل فى الدين مع اصحاب الديانات التانية وجربت اقضيها مراجيح واقعد اهزر عمال على بطال والعب جيمز و ارغى على الفاضى
وفى الآخر اعلنها وبكل صراحة انى ماوصلتش لحاجة
معظم الدراسات اكدت ان القاعدة الطويلة على الشات بتسبب عزلة وفى الاخر الموصوع بيقلب بادمان ...ياما بيوت اتخربت بسبب انعزال حد من الزوجين على الكمبيوتر واهماله للتانى..ياما ناس سقطت وفشلت فى دراستها
(اللى هو انا فى القريب العاجل)بسبب ادمان القاعدة على الكمبيوتر بصفة عامة و الشات بصفة خاصة
طب ويا ريت القاعدة على الشات دى بتكون بفايدة ...اتحدى ان عندنا فى مصر النسبة مش هتتعدى ال5% اللى بيتكلموا كلام مفيد والباقى كلام اقل ما يوصف عنه انه فاضىىىىىىىىىىى
وفى الأخر الواحد هيلاقى نفسه بقى مدمن لحاجة مش عارف ايه أخرها
ومع الاسف يا ريت الموضوع بيكون مجرد دردشة تافهة بس لذيذة وبتضيع وقت بس
لا
كل روم فى الشات بيكون فيها شتايم والفاظ الواحد بيكون مكسوف يبص على الشاشة ..غير الكلام اللى مش محترم اللى بيتقال
بجد الروم بتتحول لمستنقع من البذاءات
والغريب اننا لما نيجى نسال نفسنا طب هما يعنى الناس اللى موجودة فى الشات مخلوقات فضائية ..ما هما احنا..
الغريب ان معظم الشباب اللى بيشتم فى الشات مش بيشتم فى حياته الواقعية زى ما بيشتم فى الشات او بيقل اديه زى ما بيعمل فى الشات..بالعكس دايما الناس اللى تكون مستقوية نفسها على النت وعايشة الدور بيكونوا غلبانين جدا على الحقيقة ..يعنى الشات بقى مجرد وسيلة بنطلع فيها الكبت والنقص اللى معظم الشباب بيعانى منه
وبعدين الغريب ان الواحد يلاقى ولد عمال يشتم وطايح فى الناس كلها وتلاقيه بعديها بيقول
"برب هروح اصلى وجاى !!!"
منتهى التناقض
وبعدين ماتنسوش ان الواحد وهو بيشات مع ناس ميعرفهاش بيطلع اسرار عن نفسه وبيته والله اعلم بعدها ممكن يحصل ايه؟
وكمان موضوع الفشر ده بيكون منتشر اوىىىىىىىى
معظم الناس بجد بتفشر كتير على الشات
دول حتى بيفشروا فى اساميهم
كل واحد بيحاول يدارى حقيقته

وعلى فكرة ان لحد دلوقتى بتكلم عن الشات بصفة عامة لكن لسه ماتلكمتش عن ما يسمى (حب النت) لان ده محتاج بوست منفصل لوحده

لان اعتقد ان الموضوع ده هو اخطر ما قى الشات...

اللى اللقاء فى الجزء التانى من البوست ان شاء الله
بعنوان"حب الشات...صباح الاشتغالات"


ملحوظة
شكر خاص لياسمين صحبتى (هيسا هانم) اللى ادتنى الصور دى ...اصل انا كنت مش لاقيه صورة تعبر عن البوست..ميرسى يا ياسو