ياااهالواحد حاسس ان بقاله زمن مادونش
شهر كامل مادونتش بجد اخس عليا
بس انا فعلا كان عندى ظروف
يعنى غير انى كنت بمتحن وانا طبعا والحمد لله من اوائل الطلبة بذاكر اول باول وكنت مقفلة المواد كذا مرة :) عشان كده ماكنتش خايفة خالص خالص من الامتحانات...وماكنتش بروح مطبقة نوم واكل ولا اى حاجة ايه الكدب ده
غير بقى انى كان عندى امتحانات
فرح اختى كان فى وسط الامتحانات كمان:)
ماهى اصلها ناقصة
وقبل ماحد يقولى وايه اللى خلاها تعمله فى وسط الامتحانات
هقولكوا ان ريقى نشف:) بس الحمد لله اهو الايام عدت على خيررررر
الف مبروك يا شيريززززززززدى اختى
وكمان الف مبروك ليا ...امبارح اخدت الاجازة
لولولولولولولولولولولولى
ياه اليوم ده كنت مستنياه بفارغ الصبر
بجد بعتذر لكل الناس اللى انا قصرت فى الرد عليها فى الكومنتس او اتاخرت فى التعليق فى مدوانتهم
يلا بقى بما انى راجعة بعد فترة غياب ولسه مش ماستعدتش مرونة الملاعب قصدى البوستنج
هخلى البوست ده التاج اللى بعتوا ليا شادى
(ربنا يهديك يا شادى ويرجعك عن القرار بتاع التوقف عن التدوين ده اللى انت خدتوا ده )
قولوا امين
انا عارفة ان التاج ده حمض ولف على مدونات مصر على ما رديت عليه
بس يلا شادى اول حد يعبرنى بتاج
ميرسى يا شادى:) اشوفك كده داااكتور اد الدنيا ان شاء الله:)
نبدأ بقى الاسئلة مابقتش احب السيرة بتاعة الاسئلة و الاجوبة و الحاجات دى
احب شخص لقلبك؟
بجد وبدون تمثيل بابا وماما واختى ...دول خط احمر بالنسبالى
انسان مستعد تضحى بحياتك عشانه ركز فى كلمة حياتك؟
انظر اجابة السؤال الاول
بس مش عارفة بقى ساعة الجد هضحى بجد ولا هطبق القاعدة الشهيرة عيش ندل تموت جبان:)
انسان كرهته لدرجة الجنون وتتمنى لو تمسك سكينة وتنقض عليه وتغرزها فى قلبه تقتله وتقف تبص لجثته وتشفى غليل قلبك؟
لا حول ولا قوة الا بالله ....لو كان السؤال لحد كلمة الجنون كان ممكن يبقى ليه اجابة لكن ماعتقدش انى ممكن اكره حد بالشكل ده مهما عمل..وربنا يصفى نفوسنا ويساعدنا نسامح
ما هو اسم آخر اجمل كتاب كتبه بشر وكتبته ومحتفظ به حتى الآن؟
مفيش
اهم جهاز منزلى انت متعلق بيه او بتستخدمه كتير؟
الكمبيوتر وش
مكان تحس بالراحة عندما تدخله؟
المساجد لما بتكون فاضية ومش زاحمة واصلى فيها لوحدى تقريبا
مكان تحس بالراحة النفسية عندما تنظر اليه؟
مفيش....بس ممكن البحر
مكان تحس فيه بالحنين الى شىء لاتدرى ماهو وذكريات جارفة الى لاشىء؟
الشارع اللى كان فيه مدرستى...لما بدخله بفصل عن الدنيا ..كل مكان ليه معنى عندى...وذكريات الشقاوة والبلاوى اللى كنت بعملها وانا صغيرة
اجمل مدينة زرتها داخل مصر؟
شرم الشيخ
اجمل مكان طبيعى رايته فى مصر؟
شرم بردو
شخصية كارتونية تحبها ؟
مارد وشوشنى اللى فى فيلم شركة المرعبين المحدودة و دونالد داك
نوع هاتفك؟
سونى اركسون
سرعة البروسيسور بتاع جهازك؟
يرحمكم الله
حجم الذاكرة-هارد-جهازك؟
الله يسمحك بردو مش هرد عليك
المساحة اللى بتشغلها المواد الاسلامية على جهازك؟
كتيرة ..بس العبرة مش بالمساحة...العبرة بالسماع والاستفادة وانا بصراحة بقالى زمن ماسمعتش دروس فى الدين على الكمبيوتر
نفس المساحة السالف ذكرها فى قلبك-الاجابة لنفسك عشان الرياء يا جماعة؟
الله اعلم
اهم هدف انت واضعه لحياتك الأن؟
بطلت احلم
بس عموما انى اعرف احقق التوازن بين الدين والدنيا ...لا اكون متزمتة ولا اكون بعيدة عن ربنا
كمان نفسى اشتغل فى التحكيم الدولى (اكيد مش تحكيم فى الكورة يعنى)
مواصفات فتاة /فتى الاحلام بالنسبة لك؟
بصوا اصل انا عايزة واحد عمولة ...يعنى ماعتقدش انى هلاقيه...بس اهو كلوا احلام فى احلام
1
يكون متدين ويعرف ربنا ..لا يكون متزمت ولا متسيب
2
يكون شخصية محترمة ويعتمد عليه وناجح فى شغله
3
يحبنى ولو ماحبنيش او الحب راح -كالعادة -بعد الجواز يفضل يحترمنى طول العمر ومايهنيش ابدا
4
يكون اهلاوى اكيد يعنى
يعنى مش معقول مثلا اتجوز واحد زمالكاوى ممكن نخلص على بعض بعد اى ماتش مثلا..او على الاقل يكون مالوش فى الكورة وانا ابقى اسسه على ايدى واخليه اهلاوى
وكمان يرضى يودينى الاستاد ..بابا مش بيوافق خالصصص:( لما بقوله انا عايزة اروح الاستاد يا بابا يقولى انتى اتجننتى يا بت:( اقوله طب هروح ماتش مفهيوش جماهير كتير عشان عايزة اشوف اللعيبة على الحقيقة بردو مش بيوافق
5
يكون دمه خفيف ومش نكدى
شعورك لما بتسمع كلمة مصر؟
عادى ...بفتكر الخيبة التقيلة
شعورك لما بتسمع كلمة يهود؟
عادى بشر...على دين مختلف عن دينى ...لازم نفرق بين اليهود والصهاينة
شعورط لما بتشوف ضابط شرطة؟
عادى بردو...يعنى هعمله ايه يعنى
شعورك لما بتشوف الكناس العجوز فى الطريق؟
بيصعب عليا
افكارك تجه شاب يلبس جلابية بيضاء قصيرة وله لحية وبجيبه السواك ويمسك مصحف فى يده؟
بقول يا بخته متدين ومش همه راى حد فيه وعامل اللى هو شايفه صح...بس طبعا ربنا اعلم بالنوايا
احساس يراودك فى اشارة مرور مغلقة بسبب مرور مسئول كبير؟
بتخنققققققققققق
................................................................................................................
رجاء خاص يا جماعة ..دلوقتى انا عايزة اكتب بوست و عايزة احط معاه تسجيل عندى ريل بلاير صوت بس...طبعا انا محدثة بلوجات ...مش عارفة اعمل اى حاجة ولا حتى عارفة احط اغنية للبلوج ولا السايتات المهمة...احم احم ادى اخرة النت المجانى بقى اللى خلانى اقعد على النت..مالينا البلد انا عارفة:) ..وماحدش يقولى غيرى البلوج للكلاسيك مود واشتغلى بالاكواد والحاجات العجيبة دى....انا عايزة حاجة سهلة ...بليز يا جماعة ابقوا قولولى فى الكومنتس الطريقة انى احط مع البوست اللى انا عايزاه ده..واللى يدخل ولقى حد سبقه وقالى مايستخسرش ويشرح تانى ..التكرار يعلم مين؟؟؟اكيد الشطار..ومانجلكوش فى حاجة وحشة
9 comments:
تحياتي
أولا ألف مبروك للعروسين....و سمحيني..لان بدأت بهم....لان الخطوبة او القران المفروض يكونوا مرة واحدة في العمر.
ثانيا الف مبرزك لك بمناسبة انتهاء الامتحانات....و بالتوفيق لك و للجميع ان شاء الله.
تحياتي و تقديري
مبرووك الاجازة ...اهىء اهىء...لسه هاخدها يوم 20 ....الهى تاخد الدكاترة اللى فى بالى ...:)
وكمان استنى مين بيقلد مين ...
فى مواصفات فتى احلامك ...شد نظرى انك عاوزاه اهلاوى ...ههههههههههههههه
لما عملت التاج ده ...كنت كاتب زيك ...والناس تدخل تعمل كومنت عالنقطة دى ...واللى يقولى مبحبش الزمالكاوية ...ههههههههه
الف مبروووك لاختك...وعقبالك ان شاء الله
ههههههههه
الف مبروك لاختك وعقلال ما ابركلك مرتين
مرة علي نجاحك ومرة عثورك علي ابن الحلال اللي بالشروط الي انتي عايزاها بس اهمها يكون اهلاوي
انا بقي خطيبي مش ليه في الكورة
يعني هأسسه انا
انا لولا يوم خطوبتي كان يوم الجمعه الي فاتت كنت سبته وقعدت اتفرج علي الماتش
هههههههههه
نظرا لان عودتك للتدوين تسرنا طبعا
سيادتك مطالبة بالتاج دة
ليكي تاج عندي هتجاوبيه يعني هتجاوبيه
سامعك بتقولي احنا مش فاضيين للتاجات والكلام دة...
برضة هتجاوبيه
تحياتي
والله انت برنس عشان قلت ان شرم الشيخ هي اجمل مدينة زرتها في مصر
الربان
الله يبارك فيك وميرسى على تشريفك هنا وبجد ياريت ماتكنش اخر مرة
تحياتى
_________________________________
سفاح كرموز
الله يبارك فيك
ههه حتى التقليد كمان فى مواصفات فتى الاحلام:p
تحياتى
__________________________________
سمرا النيل
العروسة عندى فى البلوج يا دى الهنا يا دى الهنا
عارفة انتى خطوبتك كانت بعد فرح اختى بيوم واحد يلا بقى عقبالك انتى كمان يا جميل...لازم بقى تأسسى خطيبك على حب الاهلى ..بلاش تخلى دم غريب يدخل العيلة هههه ربنا يوفقك يا انوجى
تحياتى
________________________________
احمد سمير
يا اهلا اهلا...يا سيدى انت تامر بس ...حاضر ان شاء الله هجاوب على التاج فى القريب العاجل
تحياتى
_______________________________
شرم الشيخ
طبعا شرم دى من اروح الاماكن اللى فى مصر...كنت اسمع ان تونى بلير دايما المشتى بتاعه بيكون هناك
اهلا بيك يا شرم ...واتمنى انك تيجى هنا على طول
تحياتى
والله كان نفسي افيدك في موضوع الأغاني اللي عايزه تحطيها مع البوست ده بس انا برده كل الحركات اللي بعملها في مدونتي بتكون جايبها جاهزه من مواقع تانيه
بس بجد انتي مصيبه
يا خساره مش هاننفع لبعض انا صحيح ماليش في الكوره بس ابويا زملكاوي صميم يعني ممكن تقتلوا بعض بلاش ياختي
ههههههههههههههه
سلاااااااااااااااااااااااام
ياوهوي :|
لا:|
ياللهول:|
حد يغزني بمطوة ياجدعان :|
نيرمو رجعت ياردااااااالة
ياخارجة من باب الحمام وكل خد عليه خوخة
انا قلت البنت طفشت من الامتحانات واعتزلت الحياة العامة وهاجرت الخليج تشتغل بسبعميت ريال ببركة عقود عائشة عبد الهادي
لا وكمان شيريززززز اتجوزت:|؟
وبسم الله الرحمن الرحيم وهنبدأ الليلة تيررارارارا ... بس استني هنا :|
مش عارف مين الندل فينا :ش
لا دي بقى فيها حق عرب جامد اوي
أوتجرؤين :ى؟
كفاية كدا ولما ارجع من الامتحان هفصص التاج دا حتة حتة خلي بالك انا اهلاوي;) احذري مني :)
سوري عالرد المتأخر بس اديكي شايفة العيال ومشاكلها
ملحوظة : انا سنجل ياجماعة متقطعوش رزقي
كنت فاضي شوية قلت يا واد ارجع وراء شوية ز شزف صحابك كاتبين ايه
لقيت التاج اللذيذ ده
بقرا لقيت انا بالضبط فتي احلامك يا نرمين
:p
و هوديكي كل ماتشات الكورة
و شهر العسل هناخد من اسبوع في اسبانيا نتصور مع اللعيبة هناك
ها ايه كمان
سلام يا قمر
Post a Comment