للمرة المليون بتأكد ان انا ممكن اكون جوايا 5000 الف حاجة متناقضة فى نفس الوقت...يعنى ممكن اكون بكره حاجة و افضل طول مانا قاعدة اقول انى بكرهها وفى الاخر لما تروح منى او تبعد عنى احس انى تعبانة اوى من غيرها..والعكس صحيح ساعات بكون فاكرة انى بحب حاجة وان حياتى من غيرها مش هتمشى وفى الاخر الاقيها حاجة ولا تستاهل (على راى شيرين:غلطت مرة وقلت على الرخيص غالى..المهم ما علينا)...وانا اللى حصل معايا المرادى هى الحالة الاولى ..اللى حصل انى كنت مشتركة فى موديل الامم المتحدة اللى فى جامعة القاهرة(مش عايزة حد يطلعلى فى النص كده ويقولى يعنى ايه موديل ...طب خلاص هقول بسرعة يعنى ايه موديل ..الموديل ده بيكون كده نشاط بيكون هدفه ان الواحد يعرف المنظمات ماشية ازاى ..يعنى مثلا فى موديل مجلس الشعب يخليك تعرف ازاى مجلش الشعب بيناقش القوانين وازاى بيتم التصويت ...وفى موديل الامم المتحدة(وده اللى كنت انا فيه)وفيه الواحد شاف نموذج مصغر من اللى بيحصل فى الحقيقة فى الامم المتحدة وازاى بتم مناقشة القضايا..اظن كده عدانى العيب بعد هذا الشرح الوافى ..كنا بنقول ايه بقى :ي)
المهم انا بصراحة كنت كارهة الموديل ده جدا(معرفش ليه) وكنت بحلم باليوم اللى اخلص منه..يمكن عشان طبيعة الناس اللى فيه بتختلف عن طباعى مش معنى كده انى صح وهما غلط او العكس ..لكن اللى اقدر اقولوا انى على طول كنت حاسة انى مش مرتاحة معاهم...وكنت فاكرة انى لما اصدق والموديل يخلص..وفعلا الموديل خلص..بس مش عارفة ليه مش حاسة انى فرحانة انو خلص بالعكس انا قاعدة افكر..الموديل ده كان مش بالوحاشة اللى انا كنت مصوراها لنفسى ...الناس اللى فيه اينعم هما مختلفين عنى...بس فى الاخر اتعودت عليهم وعلى طريقتهم ..ليه انا كنت عازلة نفسى بالصورة دى كده!!! اما انا انسانة غريبة فعلا...يلا ماحدش بيتعلم ببلاش وعلى العموم وصف حالة الاكتئاب اللى انا فيها دى بيسموها (Pcd)
post conferance depression اللى هو اكتئاب ما بعد المؤتمر...يلا على العموم انا طلعت من حوار الموديل ده انى ادى فرصة لنفسى احكم على الحاجة و كمان مش معنى انى الاقى حد مختلف عنى انى انكمش و اخاف و احس انه مش هيحبنى واحسس نفسى بالعزلة.
5 comments:
احلي حاجة انك بتتكلمي من جوة ومش ومش بتكتبي لمجرد الفصة وبتحاولي تتعرفي بغلطتك
نسيت اكتب اني انا ستك وتاجة راسك مني:ي وعايزة اشوف اجمد من كدا لو سمحتي يا نرمو
يا نهار ابيض مونى هانم جت البلوج بتاعى و علقت..كام طلقة فى الهوا كده احتفالا بمونى....ميرسى يا باشا على رايك ..وعايزاكى كده تنورى البلوح بتاعى
تصدقي الحالة دي كانت ساعات كتييير بتجيني و أنا في إعدادي
كنت مرات بحس إني لازم ما أبقاش مع الناس دول
أو إني مختلف عنهم يبقى لازم أسيبهم و أتخلص منهم بأول طريقة تصادفني
لكن بعد ما نضجت شوية و حسيت بالدنيا فعلا في ثانوي
اتعودت بعد كدة إني أسمع من أي حد مهما كان رأيه و مهما كان أسلوبه في التفكير و الكلام و بقيت فعلا أستمتع بإستنتاج شخصيات الناس دي و أعرف الظروف اللي خلت شخصيتهم تبقى كدة
ببساطة بقيت أحب أقعد معاهم زي ما بقعد مع أساتذتي و أصحابي العاديين
لأن في مثل تقريبا ولا حكمة عن واحد سألوه إنت ليه ما بتخجلش من مصاحبة الأشرار
رد عليهم: عشان أتعلم السلوك الغلط اللي بيخلي الناس تنفر منهم و أتجنبه
و يمكن زعلك عليهم دا هوا إحساس داخلي إنك كان ممكن تتعلمي منهم
تحياتي
أه نسيت أقولك
مؤلف ((الخيميائي)) برازيلي إسمه بابلو كويلو
Post a Comment