طبعا انا عارفة ان البوست ده متاخر شويتين تلاتة عشان كان المفروض اكتبه يوم الاستفتاء او قبله .بما انه بيتكلم عن الاستفتاء...لكن واضح انه بوست نحس كل ما اجى اكتبه مش عارفة ايه اللى يعطلنى واروح مش مكملاه(يمكن الوبست نفسه قرفان من الموضوع)المهم ما علينا...طبعا لو حد كان متابع البرامج المصرية (الحكومية) اليومين اللى قبل الاستفتاء كان هيلاقى فى وشه برامج بتتكلم عن التعديلات العظيمة و البوابة اللى احنا بنعبرها (بتاعة المستقبل دى)واننا لازم نقول نعم للديموقراطية و نعم للرخاء و الهطل ده....اما بقى البرامج الفضائية فهى اتكلمت على الموضوع على الحياد..وافتكر انى كنت بتفرج على برنامج 90دقيقة ولاقيت المذيعة مى بتسال معتز بتقوله : انت هروح يا معتز الاستفتاء قالها: انا عن نفسى مش بحب السلبية وهروح...
ومن هنا السؤال...هل اللى ما يروحش الاستفتاء يبقى سلبى؟؟؟؟؟
ج-انا شايفة ان الاجابة انه واقعى اكتر ماهو سلبى...ماهو اصل يا جماعة احنا مش هنشتغل بعض ونقول ان حد فينا مصدق ان الاستفتاء ده نزيه وان نتايج التوصيت هتكون نزيهة بردو...الكلام ده الواحد يسمعه فى برامج الحكومة(البيض بيضك-التعبير مأخوذ عن خالد كساب)
عارفين السنة اللى فاتت ..ايام الشوطة بتاعة الانتخابات الرئاسية...انا بقى كانت واخدانى الجلالة...وقلت لازم اروح عشان ابقى عملت اللى عليا وبتاع...وياريتنى ما اخدتنى(الجلالة)...اتشحطت يومها...اول حاجة روحت القسم قالولى انت تروحى مدرسة عباس العقاد هى المنطقة بتاعتك روحت المدرسة (بالصدفة كانت مدرستى فى الاصل)دورت على اسمى مالقتهوش...قالولى روحى مدرسة مش عارفة باين السيدة خديجة (والله ما فاكرة الاسم)..وروحت المدرسة اللى قالولى عليها...وهناك لاقيت بنات كتير ادى...قلت طب الحمد لله اكيد الواحد هيلاقى اسمه...و الحمد لله مالقتش حاجة...المهم وانا واقفة جوا والمكان كله ظباط و كده كانت واقفة جنبى بنت من سنى..كانت بردو بتشوف اسمها...فانا حاولت اشد كلام معاها اهو الواحد يسلى نفسه بدل اللطعة اللى الواحد فيها دى...سألتها (وياريتنى ما سالتها) انتى بقى ناوية تنتخبى مين :ي:ي (وعلى وشى ابتسامة بلهاء)...لاقيت الاجابة بتقولى حسنى مبارك...انا بقى (وش مبلم )قلتلها احنا ضعنا...لاقيتها (بابتسامة واثقة بتقول: بالعكسسس...وقتها جه فى بالى حاجتين...اول حاجة المكان كله ظباط:)...مفيش وقت للعواطف يعنى اى كلمة هتفلت منى هيعلقونى على طول على باب اللجنة...وانا جبانة اوى ومع اول قفا هبيع القضية...قلت يا واد طنش خالصصصص....وتانى حاجة جت فى بالى ...اعلان دعاية مرشح الحزب الوطنى(انا ماجبتش سيرة حد) بتاع مشروح الالف مصنع و الالف مدرسة وعرفت ليه البنت واثقة من اجابتها...البت يظهر كان واكلها العشم ان احفادها يلحقولهم مكان فى المدرسة و كده...المهم ويارب فى الاخر المشوار جه بفايدة...بردو فى الاخر مالقتش اسمى..ومن ساعتها وانا قررت اقاطع اى حاجة فيها اخد رأى وتصوت و كده..الغريبة بقى ان بعدهابكام يوم حصل حاجة....فعلا ماكنتش على بال خالص...وكانت مفاجاة بالنسبالى و اكيد بالنسبة للجميع...المفاجأة ان مرشح الحزب الوطنى هو اللى كسب:):):)شوف البت كان عندها بعد نظر ازاى.....يلا بقى احب اختم بآية جميلة بتصبرنى على اى حاجة فرسانى فى الدنيا دى بصراحة انا مش فاكراها اوى...بس ده معناها ..ولا تحسبن الله غافلا عما يعمل الظالمون
15 comments:
يا بنتي انتي حامقة نفسك أوي كدة لية؟
ينعن أبو التصويتات و الإستفتاءات على أبو اللي بيعملها
طب أنا أهو قدامك
شفتيني اكلمت
شفتيني قلت حاجة و لا كتبت بوست ع الهطل دة؟
شوفي بقا الكلام الصح
الفرج جاي
لأ مش فرج البقال
فرج ربنا يعني
يا ما عدى على الأمم أيام عصيبة و أحوال ضعف قعدت مدد طويلة تقدر بمئات السنين
مش هنصبر كمان شويتين؟
صدقيني...الفرج جاي قريب
و سيبك من الإيجابية ووجع الدماغ و الهباب دة
احنا ناقصين يعني؟
الفرج اه جاي
بس لما كلنا نحس اننا مسؤلين
يعني انا رأيي ان كل واحد كان لازم يروح الاستفتاء بغض النظر عن اي شيء اخر
نعمل اللي علينا ونكون ايجلبيين
شوية شوية
ومع الزمن
ح يتغير الحال
اصل الحال مش ح يتغير في يوم وليلة
تحياتي و احترامتي
نعم للسلبيه
لا للتعديلت الدستوريه
محمد فوزى
اهلا بيك يا باشا....انا مش حامقة نفسى ولا حاجة...انا خلاص الموضوع قلب معايا بلا مبالاة ...اما النسبة لموضوع فرج...فواضح ان فرج تاه فى السكة ومش هيجى مصر ابدا:( كلنا عارفين فرج هيجى فى حالة واحدة بس...بس قولوا انتو بس يا رب:ي
شادى فايد
اهلا بيك واتمنى ان دى ماتكنش اخر زيارة...بالنسبة لموضوع الايجابية...احب اقولك ان حال مصر يخلى الواحد يسلك طريق من الاتنين و الاتنين فى الاخر مش هيوصلوك لحاجة...اول طريق انك تكون ايجابى بس هتكون عامل زى اللى بيزق فى حيطة وفى الاخر الواحد هيجيله اكتئاب وهتحس انك بتضحك على نفسك و تشتغلها... و مش توصل لحاجة...اما الطريق التانى (وده اللى انا اخدت بيه)انك تكون سلبى بس هتكون شارى دماغك وفى الاخر بردو مش هتوصل لحاجة ...لسه يا شادى وقت الايجابية ماجاش ...صدقنى فى الوقت الحالى وفى الظروف اللى احنا فيها دى ماقدمناش غير اننا نستنى نهاية العهد ده ...قول يا رب:ي تحياتى
احمد مختار عاشور
بجد انا فرحانة انك جيت البلوج بتاعى...انا بقالى شهور بتفرج على بلوجات...شفت اشكال والوان ...وبجد البلوج بتاعك من البلوجات المتميزة جدا اللى شدت انتباهى وحسيت ان اسلوبها مختلف وسلس جدا...رايك اكيد اسعدنى..وبالنسبة لموضوع البيض بيضك:ي والله انا اول مرة اعرفه كان من خالد كساب مع انى قارئة جامدة جدا لبلال فضل ...معلش بقى جت منى اوايت:ي
تحياتى
محروس
مية مية يا محروس ...هو ده الكلام ولا بلاش...واهلا بيك فى البلوج
لم يصوت على التعديلات الدستورية سوى أعضاء المحليات وموظفيها والعاملون بها . في الساعات الأولى من التصويت كانت اللجان خاوية من أي فرد يقون بعملية التصويت سوى أعضاء المجالس المحليه وبعض الموظفين والعاملين الذين تم أجبارهم من مديريهم على الأدلاء بصوتهم لصالح الاِنقلاب الدستوري . اللجان كانت خاوية تماما والمشرفين على الاِستفتاء كانوا اِما جالسين على الكراسي في الشمس أو يتحدثوا مع بعضهم البعض عن أحوال الدنيا والناس والتعديلات ونواتجها وبأنهم جميعا (عبد المأمور ) وبأن الناس لن تأتي كما حدث قبل سابق وسابق وسابق منذ خمس سنوات وأكثر قبل المرحوم الملقب بالأشراف القضائي السابق على نزاهة الانتخابات والاستفتاءات . الشئ الملفت للنظر والكيان هو الهدوء الشديد الذي كان يكسو البلاد أو بعض البلاد فالله أعلم بالباقي كذلك مارس الاعلام دوره بان الامور تسير على قدم وساق والمصريون يصوتون لمستقبلهم مع أن الشعب من الأصل لم يخرج من بيته لكي يقول نعم أو لا بأستثناء موظفي الاِدرات التابعة للحكومه والذين طبعا سيقولون نعم لأجل أي شئ في المقابل حتى لو كان بضع من الجنيهات وعلبة كشري . لقد استطاع الشعب المصري ان يؤكد على رفضه لما يحدث أو على لا مبالاته أو ان الامر ليس له أهمية عنده نظرا لأن الحكومه ستفعل ما تريده سواء برأيه أو رغم أنفه . هكذا كان حال شعب مصر يوم الاِستفتاء على الدستور والمؤشرات على ذلك انه في عشية ليلة الاِستفتاء كان الناس مشغولين بشراء حلوى المولد النبوي الشريف واللحمة والله أعلم هل سيجدوا ذلك العام القادم أم لا ؟؟؟
عمــوما كــــــل سنــــــــــــة وأحنا طـيـبـيـن
وحــــلاوة المـــولـــد يـــــــا دســــتــــور
نرمين :|
طب والله شكلك اللي في دماغي
مفيش واحدة كلمتها في مصر دماغها تربية معتقلات وواخدة ضربة شمس زي عمونا خالد كساب غيرك انتي
المهم بقى الف مبروك على البلوجر الجميل دا وانا بشجعك انك تكملي فيه بس بلاش تكتبي معلومات شخصية لتروحي زي علاء ويجيبولك جابر بتاع الكرنك
اكتبي اكتبي اكتبي لان دا الحاجة الوحيدة اللي احنا قادرين عليها
مصر فيها اكتر من سبعين مليون قلب مقهور ويدوب كام لسان قادرين يتكلمو يتعدو على الصوابع
تحياتي ليكي على البلوج دا او زي مازي اخوانا الفرنجة بيقولو " ارفع لكي القبعة " بس هما مش سابولنا قبعة نرفعها لاننا كلنا مرفوعين
كنت بسأل لو تقدري تنزلي فقرات من مقالات دستورية سواء يومي او اسبوعي تطعمي بيها البلوك علشان مش نستنى كلامك كدا كل عشر ايام زي البنت اللي عملت كتاب بنات الرياض
وكبداية انصحك تجيبي مقال بلال فضل في الدستور اليومي يوم السبت
كان بيتكلم عن اداب النكاح وعلاقتها بالاستفتاء
ماهو اللي بيحصل فينا علاقته الوحيدة بالاداب هو قلة وقسم قصر النيل المشهور بقضايا الاداب
بالنسبة للأستفتاء احب ابشرك ان نظرتك بعيدة المدى اوي وكويس انك وفرتي المشوار لان احب اقولك الدايرة اللي انا ساكن فيها 32 الف صوت انتخابي ونتيجة الاستفتاء فيها 30 الف قالو نعم
ايوة تلاتين الف
والف قالو لا والف اصوات باطلة يعني نسبة التصويت 100%
هاف ا نايس داي يور هاينس
ندل:| هو انت بجد ندل اللى انا اعرفه :| نفس طريقة كتابة الاسم كمان :ي لو انت بجد ندل اللى فى دماغى ابعت قول امارة....مستنية ردك سلام:ي
يا بنتي
اتبعي الحكمة الخالدة
طنش تعش تنتعش
وكبري دماغك
بلا استفتاء بلا نيلة بقا
مهندس زراعى
اهلا بيك ...انت فعلا جيبت اللى بيحصل ....يلا بقى الحمد لله ...هنعمل ايه يعنى:ي
واحد من الناس
هو ده الكلام ولا بلاش ياريتنى كنت اخدت بيه من زمان
اهلا بيك ويارب ماتكنش اخر زيارة
بتمني في العادي الفكر يتغير لو كل واحد وقف عند نقطة وقال جت عليا يبقي مش هنتحرك من مكانا نسبها علي ربنا ونتغير في سبيل الله بسمع ساعات ان واحد ضحي بنفسة علشان شخص او مجموعة اي قبيلة حتي وبيبقي شهيدلانة مات وهو بيدافع عن حد لاحول لة ولا قوة ما بلكم اللي بيموت دفاع عن البلد كلها او دين لكن الناس مش مدركةان الحياة مجرد حصد اعمال هنتحاسب عليها يوم الحساب فايتري هنلاقي حاجة نقولها سؤال شغلني دايما وبيدفعني للتفكير والتغير والتنفيذ كمان وفرحانة بيكي يانرمو لانك عندك الحتة دي اة مش بتغيري حاجة في الزمن بس باذن الله توصلي للي انتي عايزاة (ستك وتاج راسك مني)
السلام عليكم
قال الله سبحانه وتعالى ( ان الله لا يغير ما بقوم حتى يغيروا ما بأنفسهم )
يلا بقي نغيير نفسنا من سلبيين سواء بالتصويت او بعدمو
ونبقي ايجابيين
امارة امارة !!! هو في امارة اكتر من مصراوي والايام السودة بتاعته ؟
هههههههه ازيك يا ندل... انا ربنا تاب عليا من مصراوى ...عقبالك :p
بس هو انت عرفت البلوج منين ؟؟؟اكيد امانى و امنية ...يلا بقى على العموم نورت البلوج ..واتمنى ان انت كمان تعمل بلوج عشان انا عارفة انك مثقف جدا و اكيد عندك كتييييير ممكن تكتبه..عايزة اشوف ابداعك .. يلا سلام
مررنا جميعا كشعب بحالة الولادة المتعثرة لما سمي بالتعديلات الدستورية . والحمد لله وبعد ما مررنا به رزقنا بما كنا لا نريده ولا نأمله رزقنا بكل شئ سيصعب علينا القادم أو سيصعب علينا الموجود والدائر . الحمد لله واهب كل شئ رازق الفقراء وملاذ التائهين كانت نتيجة
الاِستفتاء مبهرة الى أقصى الحدود وكانت كما توقعها الجميع . وانتصر رجال المستقبل ورجال الأعمال .الشئ الذي يسألة رجل الشارع الان هو ( وماذا بعد التعديلات الدستورية ) هل سيتم الأسراع من أنهاء عملية الحكم والأقاويل حوله وتخرس كل الألسنه بواسطة الدستور الجديد أم سيتم حل مجلس الشعب لأقصاء المعارضه الاسلاميه وغيرها من المجلس بغرض أتاحة الفرصة لوجود رجال لا يعرفون أصلا معنى كلمة مجلس شعب او دستور او حتى معارضه أو حكم أو سيتم أتخاذ الأجراءات ضد الشرفاء بواسطة ما يسمى (بقانون الأرهاب ) وذلك عند اللزوم ألأمر أصبح الان صعبا على رجل الشارع البسيط والفلاح الذي لايملك سوى فأسة والعامل الذي يطالب بزيادة أجرة أو يطالب بألاصلاح بداخل مصنعه . الأمور اصبحت تتعقد أكثر من سابق لأن الجميع الان لا يعرفون ماذا سيحدث والشئ الذي يلفت النظر الان هو حالة الهدوء الشديد من جانب الحكومه ورجالها ومن جانب المعارضه ورجالها سواء معارضه اسلاميه او غيرها . فهل سوف نرى سيئا في الايام القادمه ؟ أم سنرى المستقبل بأشراقه ؟ هذا هو حال الشعب في الشارع هذا هو حال من أستمع الى أجهزة الراديو والتلفزيون المصري وحال من وزع عليه أهداف التعديلات الدستوريه من جانب نواب الشعب المتمثلون في الاخوان او المستقلون
Post a Comment