فى مصر عندنا كلمة (اهمال) دى بتستخدم كتير ...وبتكون سبب وتفسير منطقى لأى حاجة تحصل عندنا(ماشاء الله الكلمة عاملة معانا شغل جامد) يعنى عبارت تغرق نقول اهمال...مسارح تتحرق نقول معلش اهمال...قطارات تدخل فى بعضها نقول ده بسبب الاهمال!!
يمكن اقرب تاريخ استخدمت فيه كلمة اهمال كان يوم السبت اللى فات الموافق يوم 7 ابريل,اليوم اللى حصل فيه الحادث المشؤم بتاع الاتوبيس اللى اتقلب بطلبة كلية تربية جامعة بورسعيد اللى كل ذنبهم انهم حبوا يروحوا رحلة!!
بجد حاجة تحرق الدم...كلمة اهمال مش لايقة على وصف الموقف ...المفروض نقول استعباط- استهبال اهمال دى كلة قليلة .
طالب من اللى نجيوا من الحادثة قال ان الاتوبيس اصطدمبمدخل مدينة دهب وان الشرطة حررت محضر بده ووقعت غرامة على السواق وبعدها كملوا طريقهم(يعنى كانت حادثة صغيرة كده للتسخين عشان الطلبة تكون مستعدة للحادثة اللى بعدها) وبعدين لقيوا ريحة شياط فى مؤخرة الاتوبيس فالطلبة راحت قالت للسواق قالهم(مفيش مشكلة!!!) بعدها بدقيقتين لقيوا الأتوبيس بيتدحرج واتقلب بيهم واصطدم فى حفرة ...وطبعا العناية الآلهية فى المقام الاول و الجهود الذاتية للمارة هما اللى خرجوا الطلبة من الأتوبيس وهو مقلوب (وسلسمى بقى على النجدة و وحدات الانقاذ و الشرطة و الحاجات الوحشة دى).
الغريب انهم لما سألوا السواق بعد الحادثة قالهم ان الأتوبيس كان فى حالة جيدة!!!(مش عارفة الأتوبيس كان محتاج يعمل ايه تانى عشان يثبتلهم انه مش فى حالة جيدة) لكنه فوجىء ان الفرامل اتقطعت وراح لورشة صالحها وبعدين كمل طريقه ولكنه فوجىء بأن الاسطوانة متآكلة وانو معرفش يعمل حاجة لأن الأتوبيس كان مندفع بقوة فانقلب
انتهت الحادثة اللى اسفرت عن موت 5 واصابة بقية الطلبة ...لكن فى حوادث زيها هتحصل لأن عندنا فى مصر الحاجات دى عادى بتاخدلها يومين وتتنسى (يعنى هيحصل الطقوس المحفوظة...الرئيس مبارك يتابع حالة طلاب الحادث..قام اللواء فلان و العقيد علان بزيارة الطلبة فى المستشفى وياخدلهم كام صورة هناك جنب الطلبة وكل سنة وانتو طيبين ) وبطعا كل ده بيأكد اننا اكيد اكيد فى مصر مش هقول غير ربنا يرحم الطلبة اللى ماتوا و يصبر أهاليهم ويشفى المصابين
13 comments:
ربنا يتولنا جميعا برحمته
انا ساعات بيجيلي تهيئات ان الاهمال ده حاجة كويسة
الاهمال بقى هو الشيء العادي
والالتزام بقى حاجة غريبة
وبما اني مهمل كبير
بدعو لنفسي ولكل الناس
ربنا يهدينا جميعا
امبارح في حلقة القاهرة اليوم:
عمرو اديب استضاف مساعد وزير الداخلية للمرور ومعاه رئيس مصلحة الطرق والكباري والحمد لله الحلقة اسفرت عن نتيجة واحدة ومهمة الا وهي:
انهم شغلهم في السليـــــــــــــــــم وكل حاجة تمام بس المشكلة ان احنا اللي ما بنعرفش نركب مواصلات
اه والله.....اثبتوا ان احنا اللي ما بنعرفش نركب مواصلات انما كله في السليم تماما
بس خلاص
تحياتي ليكي
أولا:
أنا أنعى و بخالص الأسى و التقدير الطلاب المساكين اللي ماتوا وربنا يصبر أهاليهم يا رب
تانيا:
دا ما اسموش اهمال يا نرمين
دا جزء من إحدى الخطط الخمسية للحكومة الرشيدة لتصفية المواطنين نظرا للأعداد الهائلة الموجودة منهم و اللي بيعتبرها النظام عالة - آل يعني كان بيصرف عليهم - فكرك يعني هيتحركوا ولا يعملوا حاجة؟
دول عايزين أساسا يخلصوا من الشعب
البقية ف حياتنا
في بوست لسة كاتبه عن الإتقان حلو موت
ابقي عدي عليه ف طريقك
تحياتي
الله يرحمهم يا نرمين
و يرحمنا احنا كمان
ده لو سامحنا على سكوتنا
متشكر علي الكومنت بتاعك
و علي فكرة انا معجب جدا بكلامك فعلا
ايها الاهمال كم من الجرائم ترتكتب باسمك
انا كتبت كومنت بس يظهر الانترنت اكسبلورر بيشتغل مع الحكومة علشان كدا مش وصل
بس هقوله تاني ويانا ياالحكومة في البلوجر دا
----------------------
ياجماعة ياجماعة انتو ليه مصممين تقولو ان دا اهمال ؟
كل اللي فيها ان مختل عقليا هو اللي قطع فرامل الاوتوبيس واتسبب في الحادث بدليل ان الحكومة اللي هي ولي أمر المختل دا دفعت تعويضات للمصابين في الحادث من مبدأ انه غير عاقل وانهم مسئولين مسئولية جنائية عن تصرفاته
يعني طيارة نيويورك وعبارة السلام وقطر الصعيد وتفجيرات التحرير وعبد المنعم رياض ومذبحة بني مزار عجبتكم حكاية المختل وجت على الاوتوبيس وقلتو لا ؟
صلو عاللي يشفع فيكو
على فكرة انا مختل عقليا :ي
حسبنا الله ونعم الوكيل
وبجد مشكوره على الموضوع المتقن ده
تحياتي القلبيه لكِ
شادى فادى
فعلا يا شادى الاهمال بقى هو القاعدة والالتزام هو الاستثناء
تحياتى
احمد سمير
اظاهر فعلا يا احمد ان احنا اللى مش بنعرف نركب مواصلات ..تحياتى ليك ويارب ماتكنش اخر زيارة ليك
محمد فوزى آل ربيع
حلوة فكرة المخطط ده بس هما لازم ينوعوا فى طرقهم عشان الشعب ما يزهقش..بالسنبة للبوست بتاع الاتقان....صباح الفل انا قريته اكيد من قبل ما تقول و كمان سيبت كومنت وانت رديت عليه
تحياتى
احمد مختار عاشور
ربنا فعلا يسامحنا على سكوتنا ده...بس احنا بجد مفيش فى ايدنا حاجة نعملها
خواطر شاب غاضب
اهلا بيك وميرسى على كلامك
ندل
ههههه ماعاش ولا كان اللى يقول عليك مختل يا فندم .
مهندس زراعى
اهلا بيك وميرسى على كلامك وفعلا حسبنا الله ونعم الوكيل
يا نهار إسود
دا انتي فعلا قريتيه و كومينتي (من كومينت)عليه لا و انا رديت كمان
فعلا لازم الواحد ينتبه لنفسه بعد كدة
أعراض الثانوية العامية بدأت تظهر يا جدعان
تحياتي
اهمل اهمال مهمل
ضاع اضاع ضايعين
بقولك هتتعبي زيي لو فكرتي في كمية الاهمال انا هجرت الاخبار وكل حاجة وعايز جزيرة زي بتوع المسلسل الي تكلمتي عنة في البوست السابق واعيش هناك تجي معاي بس يا خسارة مش هتشوفي مباريات الاهلي ربنا يرحمنا
THANKS FOR YOU WORK AND HAVE A GOOD WEEKEND.
الموضوع رائع
ابتسمي انتي في القاهره
تحياتي
Post a Comment