اى حاجة فى الدنيا سلاح ذو حدين... ممكن الواحد يستخدمها استخدام كويس وممكن يستخدمها استخدام وحش...عندنا فى مصر فى الغالب بنختار الاستخدام الوحش او على الاقل بندور على اتفه استخدام ليها ونعمله...زى الموبايل الاختراع ده اول ما تعمل بره كان معمول بره عشان الناس تجيب بعضها بسهولة ويخلصوا الشغل اسرع لكن عندنا الاصل اننا ماسكين موبايلات عشان نشوف مين حاطط رنة تامر والكليب بتاع نانسى ومين اللى منزل نغمة باسمه وبقينا شعب مقضبها رنات ومين اللى بيتصل عشان يسمع احلى افهات الافلام
الدكتور زويل بيقول انه لما جه مصر فوجىء انه متأخر اوى اوى فى موضوع الموبايل ده
نيجى بقى لحاجة زى النت ...طبعا بره هما مش ملايكة ..يعنى هما كمان ليهم استخدمات وحشة للنت يمكن اكتر مننا لكن بيستخدموا النت فى الغالب فى الحاجات اللى تفيدهم ...وبتكون الاستخدامات التافهة
(زى الشات و المواقع اللى مش ولابد )
فى الويك اند او على الاقل مش وقت الشغل...لكن ولله الحمد ..عندنا هنا الاصل التفاهة و الاستثناء لما نعمل حاجة مفيدة على النت..يعنى مشهد الموظف اللى قاعد على مكتبه وفاتح سوليتير وبيلعب بقى مشهدعادى ومألوف جدا ومابقاش ظاهرة تستحق الدراسة
المهم انا كلامى النهاردة هيكون عن الشات اللى اعتقد انه السبب الرئيسى فى استخدام 90% من شباب الشعب المصرى
(طبعا الاحصائية دى طلعة من مركز نيرمين للبحوث والاحصاء والتعبئة ..يعنى احصائية مضروبة بس ماعلينا)
بس انا يعنى بتكلم بلسان الواقع
الشات نفسه كفكرة مجردة فكرة غرضها مفيييييد جداااا
وهو ان الشعوب تعرف بعضها و تبادل الثقافات (الى اخر هذا الكلام الحمضان) وان العالم بقى قرية صغيرة ومش عارفة ايه... واكتر حاجة بتساعد على انتشاره هو انه رخيص ومش بيكلف حاجة ...ييعنى بقى الواحد يكلم عمه اللى فى امريكا صوت وصورة ...وفعلا دى حاجات احنا محظوظين اننا اتوجدنا فى زمن زى ده
بس
وآه من كلمة بس
هل انتو شايفين اننا (كشعب مصرى وعربى)بنستخدمه عشان كده بس ولا عشان حاجات تانية
اكييييد عشان الحاجات تانية
على فكرة انا فى البوست ده مش برتدى عباية الحكمة وجاية اقول ايه الصح والغلط
انا كنت قبل كده مدمنة شات ، كنت بعمل شات مع طوب الارض ملحدين متدنين مصريين اجانب ..جربت اعمل فيها عاقلة ورزينة واتكلم فى الدين او فى السياسة واجادل فى الدين مع اصحاب الديانات التانية وجربت اقضيها مراجيح واقعد اهزر عمال على بطال والعب جيمز و ارغى على الفاضى
وفى الآخر اعلنها وبكل صراحة انى ماوصلتش لحاجة
معظم الدراسات اكدت ان القاعدة الطويلة على الشات بتسبب عزلة وفى الاخر الموصوع بيقلب بادمان ...ياما بيوت اتخربت بسبب انعزال حد من الزوجين على الكمبيوتر واهماله للتانى..ياما ناس سقطت وفشلت فى دراستها
(اللى هو انا فى القريب العاجل)بسبب ادمان القاعدة على الكمبيوتر بصفة عامة و الشات بصفة خاصة
طب ويا ريت القاعدة على الشات دى بتكون بفايدة ...اتحدى ان عندنا فى مصر النسبة مش هتتعدى ال5% اللى بيتكلموا كلام مفيد والباقى كلام اقل ما يوصف عنه انه فاضىىىىىىىىىىى
وفى الأخر الواحد هيلاقى نفسه بقى مدمن لحاجة مش عارف ايه أخرها
ومع الاسف يا ريت الموضوع بيكون مجرد دردشة تافهة بس لذيذة وبتضيع وقت بس
لا
كل روم فى الشات بيكون فيها شتايم والفاظ الواحد بيكون مكسوف يبص على الشاشة ..غير الكلام اللى مش محترم اللى بيتقال
بجد الروم بتتحول لمستنقع من البذاءات
والغريب اننا لما نيجى نسال نفسنا طب هما يعنى الناس اللى موجودة فى الشات مخلوقات فضائية ..ما هما احنا..
الغريب ان معظم الشباب اللى بيشتم فى الشات مش بيشتم فى حياته الواقعية زى ما بيشتم فى الشات او بيقل اديه زى ما بيعمل فى الشات..بالعكس دايما الناس اللى تكون مستقوية نفسها على النت وعايشة الدور بيكونوا غلبانين جدا على الحقيقة ..يعنى الشات بقى مجرد وسيلة بنطلع فيها الكبت والنقص اللى معظم الشباب بيعانى منه
وبعدين الغريب ان الواحد يلاقى ولد عمال يشتم وطايح فى الناس كلها وتلاقيه بعديها بيقول
"برب هروح اصلى وجاى !!!"
منتهى التناقض
وبعدين ماتنسوش ان الواحد وهو بيشات مع ناس ميعرفهاش بيطلع اسرار عن نفسه وبيته والله اعلم بعدها ممكن يحصل ايه؟
وكمان موضوع الفشر ده بيكون منتشر اوىىىىىىىى
معظم الناس بجد بتفشر كتير على الشات
دول حتى بيفشروا فى اساميهم
كل واحد بيحاول يدارى حقيقته
وعلى فكرة ان لحد دلوقتى بتكلم عن الشات بصفة عامة لكن لسه ماتلكمتش عن ما يسمى (حب النت) لان ده محتاج بوست منفصل لوحده
لان اعتقد ان الموضوع ده هو اخطر ما قى الشات...
اللى اللقاء فى الجزء التانى من البوست ان شاء الله
بعنوان"حب الشات...صباح الاشتغالات"
ملحوظة
شكر خاص لياسمين صحبتى (هيسا هانم) اللى ادتنى الصور دى ...اصل انا كنت مش لاقيه صورة تعبر عن البوست..ميرسى يا ياسو
13 comments:
ايه يا بنتى انتى عمالة تعلى و تعلى
هههههههههههههه
فطستينى من الضحك حرام عليكى
...........
على فكرة
انتى مردتيش على كومنتى فى البوست اللى فات بتاعك
انا اصلا مش باخد بالى من كدة
بس خدت بالى انك رديتى على ناس و سبتى ناس
ليه يا جميل
ههههههههههههههه بسم الله الرحمن الرحيم...انت لحقت تقراه...انا لسه نشراه
لا والله يا عاشور مش قصدى اتجاهل الكومنت بتاعك...والله ده عجبنى وحتى قريته لاختى وقعدت تضحك...انا بس مشغولة فى المذاكرة وباجى كده تخاطيف..ولولا ان الوبست بتاع الشات ده حمض عندى فى الدرافت انا ماكنتش هنشره...وبعدين ما انا ماردتش على كل الناس اللى كتبوا بعدك ...غلطة مش مقصودة يا فندم...البلوج نور
ههههههههههه
الموضوع ده كبير قوي على فكرة ومتشعب جدا
بس فعلا الشات رومز دي يجب تجنبها تماما وعدم دخولها بتاتا
انا شخصيا بتكسف من المهازل اللي بتحصل فيها
يمكن حب الشات والاشتغلات دي حاجة بسيطة بالنسبة
للوساخة المنتشرة في الشات رومز
احم احم ... بوست جه عالجرح
هتعرفي اقصد ايه لما اقولك اني برد بعد سهرة كالمعتاد من الساعة حداشر مساءا طبعا لغاية الساعة خمسة العصر دلوقت ولحظك بقى اني في التهييس مود او باتري امبتي يعني هرزع الكومنت دا ومش هقولك اقوم انام ؟ دا انا هبص للسرير الاقيه جالي على طول
على فكرة الواد بتاع برب رايح اصلي وجاي لسه موجود وبشوفه كل يوم بس انتي فاتك حاجة جديدة نازلة في سستم ماسيج نازلة عن سيدنا محمد صلى الله عليه وسلم وتلاقيها نطت في وسط خناقة وتخيلي بقى البشرية اللي بتشتم : ينعل @#%#%#% ,,, وتاني سطر على طول صلى الله عليه وسلم
بقت عمالة زي وب وباك وفي ناس واخداها كوبي اهو يعملو منظر
بالنسبة للاستفادة احنا استفادتنا شبه منعدمة في معظم الاحوال والدليل فاكرة لما قلتلك على الواد صاحبي اللي من سنة مكنش يعرف يستب ويندوز ؟ ودلوقت بقوله عايز برنامج معين بالكراك قالي ربع ساعة اكتبهولك وابعتهولك !
اهو دا نفض للنت واهتم بحاجة ليها منفعة
الكلام هيكتر كدا وانا مش عايز ارد على بوست بـ بوست تاني بس في انتظار حب النت صباح الاشتغلات دا اللي هستلف منك رداء الحكمة فيه
كفاية كدا علشان عايز اشوف كومنتات البشرية ربنا يزيد ويبارك والنسل يزيد
نرميييين...أنا أول مرة آجي عندك...موتيني من الضحك بأسلوبك اللذيذ ده
عجبتني جداً حتة إن ممكن جداً يكون الإنسان ع النت بعكس شخصيته الحقيقيه...و معجبنيش بقه يا ستي إنك إعتبرتي إللي يقعد يشتم و بعدين يروح يصلي متناقض...لأن الفعلين مش عكس بعض...كلنا بنغلط و مش المفروض نسيب الحاجات الصح بجملة الغلط...ولا إيه؟
شادى فايد
هو فعلا موضوع متشعب اوى يا شادى وانا بحاول على اد ما اقدر انظمه...وانا قاعدة بكتب البوست كنت حاسة ان فى دماغى حاجات كتيرة بس مش عارفة انظمها
تحياتى
ندل
هو انت لسه فيك الخصلة بتاعة التطبيق دى!!!!! ارحم نفسك بقى انا تعبتلك..
احم احم ليه الغلط ده بقى ...انا كمان مش بعرف انزل ويندوز ... انت عارف بقى النت المجانى خلى الطبقات دى تقعد على النت. بس بجد
انت كمان لازم تعدى مرحلة مصراوى دى ..وبالنسبة لموضوع العباية ده انا مسامحة فيه ....
ندل انت صاحب مطرح.. يا سيدى اكتب زى ما انت عايز ..هنا منبر حر...ان شاء الله حتى ترد باتنين بوست مش واحد بس ...مستنية التعليق بتاعك ان شاء الله
مونى
يا اهلااااااااا بيكى يا مونى ..نورتى البلوج كله وكل البلوجات المجاورة..ميرسى على كلامك ..وبالنسبة لموضوع التناقض...طبعا يا مونى كلنا خطائين وماحدش فينا معصوم من الغلط...بس انتى اصلك ماشوفتيش الشتيمة كانت بتكون ازاى ...يعنى لما يكون سب الدين ده بالنبسالهم عادى ...تفتكرى ده مش تناقض مع الصلاة!!
تحياتى ليكى يا مون مون
أنا في الحالة دي عندي قرار واحد
اللي ما أعرفوش ما أكلموش
بعدين بتلاحظي إن كلهم بيستخبوا ورا أسماء مستعارة و معظمهم بيتكلم بلهجة مش بتاعته في الحقيقة و بيكون الخداع سهل جدا
حقيقي أنا ما بأعترفش إني عرفت إنسان غير لمن أشوفه وجها لوجه أو أقرأ آراؤه الحقيقية اللي ما بيخافش يصدرها
هوا دا الإنسان اللي ممكن أقضي وقتي معاه
يمكن صح ممكن أفتح مواقع ملحدين شيعة مسيحيين عشان أتعرف على فكرهم و كدة لكن ما جربتش إني أعمل شات معاهم
آخر مرة عملت شات كان من شهرين مع أحمد العربي و من شهر و نص مع ابن عمي عشان بس أديله أغنية كاميليا جبران (صلي ع اللي قلبك يحبه)
غير كدة لايس لي أدنى عولاقتن بالشات نوهائيا
يعني لو الفضا واكل الواحد قوي يروح يقرأ كتاب أحسنله
حتى لو عن الإقتصاد التشيكوسلوفاكي في الستينات
أي كتاب هتلاقي فيه إفادة أكتر من أحسن شات رووم
ربنا يهدينا و نكمل كدة و ما ننحرفش
تحياتي يا نرمين
والله يا اخت النرمين انا لا احب ان اجير على الاشياء لانها في الاخر اشياء نحن من نحركها وبالتالي فالعيب فينا نحن ولاكن الشات او النت او او او او من الاشياء المفيده والجميلة جدا ولاكن المشكلة فينا نحن
تحياتي ليكي ومنوراني دايما
السلام عليكم
انا اول ادخل هنا اسلوبك حلو اووي يا نرمين
وتناولتي الموضوع بشكل كويس
كل حاجة ليها مزايا وليها عيوب وللاسف احنا بانستخدم كل شئ استخدام سئ
بس السؤال اللي المفروض نجاوب عليه ليه الشباب بيدخلوا شات وبيعملوا كده مش لاقين حاجة يعملوها معتقدش ان في انسان مشغول بحاجات مفيده بيحبها ممكن يدخل الشات
في سؤال تاني احنا ليه بنسيب الواقع ونجري ورا الخيال دي طبيعتنا
اه والله يانيرمو دا حتى اللي معاه جنيه دلوقت بيقعد بيها في سيبر يشتم ويروح بيتهم راضي النفس وقبل ماينام بيفتكر " ياترى انا شتمت كام واحد النهاردة "
وبما انه بقى المكان بتاعي بقى انا عملت اكاونت علشان اسجل الندل تريد مارك وكدا
ياجماعة اوضح نقطة بس
الشات جزء من النت وزيه زي التي في زي الكيبل زي التليفون زي اي حاجة في حياتنا
بس حسب استخدامك ليها بتبقى كويسة او وحشة يعني العيب في دماغنا احنا مش في الشات كوسيلة للتخاطب
مين فينا مش عنده دش ؟
في ناس بتشوف اقرأ والناس والفجر
وفي ناس على مولتشي واخواتها
وفي ناس ربنا كرمهم جابو الدش ابو طبق متحرك ومقضينها اوروبي
خلاص كدا بقى الدش لعنة ؟ اللعنة في دماغنا احنا
وكما قال حامي حما الرياضة المصرية ابراهيم حجازي :
وللحديث بقية طالما في العمر بقية واوديكي فين ياصحة!!
محمد فوزى ال ربيع
احسن حاجة يا محمد انك ادركت الموضوع بدرى بدرى...يا ريت الواحد كان عمل زيك كده... انت عارف بقى السن الواحد ضيع وقت كبير من عمره على الشات يلا بقى ما علينا الحمد لله على كل حال
تحياتى
احمد طاهر
كلامك يا احمد بياكد كلامى اللى انا قلته فى البوست وانا اكدت على ان كل حاجة ليها استخدام وحش و حلو والاختيار لينا احنا..اهلا بيك فى البلوج ويا ريت تشرفنى بالزيارة كده على طول ...دول هما خطوتين من بلوجك لبلوجى ههههه
تحياتى
بوسى
اهلا بيكى يا بوسى فى بلوجك الثاتى توهااااان (تصفيق حاد)هههه
بصى يا بوسى اكيد انا عارفة ان الشباب ادمن القاعدة على الشات بسبب الفراغ اللى احنا كلنا بنعانى منه...ماتنسيش ان انا كمان كنت مدمنة شات...بس انا كل اللى بحاول اقوله واخرتها ايه؟؟؟..يعنى عارفة لو بنضيع وقت فى اكتر من حاجة كنت اقولك اهو الواحد بيتعلم من اى حاجة بيعملها حتى لو كانت تافهة..بس المشكلة ان الواحد لما بيدمن الشات بيحس ان بقى اسير لحاجة واحدة بس...انا مثلا صحابى معظمهم زعلانين منى لانى اهملتهم كتير...مابقتش بكلمهم فى التليفون كتير ولا مهتمة اوى باجتماعتهم كل ده بسبب الشات اللى انا ادمنته...بقيت انطوائية شوية على عكس طبيعتى خالص
تحياتى
ندل
مبرووووك الاكاونت يا سيدى عقبال كده البلوج...جامدة اوى حكاية مولتشى واخوتها دى هههههه....انا بأيد كلامك جدا وده تقريبا اللى انا قلته ان كل حاجة ليها استخدام وحش وحلو واننا هنا فى مصر فى الغالب بنختار الاستاخدام التافه للحاجة ....ان شاء الله الجزء التانى هنشره يوم 4 او 5 عايزاك بقى فى الكومنت تتجلى .....عايزه عصارة فكرك اللى عندك فى الموضوع ده تطلعها فى الكومنت بتاعك...دى رسالتنا يا ندل هههه
سلام
الشااااااااات
اموت واعرف الناس دول بيشيتوا ازاي؟!!!
جربت والله ماكدبش عليكي اني ادخل بقى واعرف بنات بقى واعمل فيها عم الجامد
دخلت لقيت الشاشة كلها شتايم من السنة للشيعة والعكس ..قلت اغير الرووم لقيت القاهرة بيشتموا اسكندرية
قلت بلاها الروووم دة اخش على واحد كمان
لقيت الاهلوية والزملكاوية نازلين تقطيع في بعض
ومصريين بيشتموا سعوديين
وسعوديين بيلعنوا العر اقيين
والدنيا هايصة شتايم من كل اللهجات واللغات
قلت ياخبر ابيض
اومال العيال صحابي بيعرفوا بنات ع الشات ازاي
رحت اسألهم اللي يقوللي ربك بيسهلها واللي يقول لي اصل انت غشيم
وواحد يقول لي اعمل تقيل هتلاقيهم جايين لك
ولحد دلوقتي مش عارف ازاي
بس معنتش عايز اعرف بصراحة...الدنيا اتزحمت اصلها قوي ومعدش في حاجة جايبة همها
طولت عليكي
بس نسيت اقولك انه بوست رائع ومدونة اروع
الاسراف في أستخدام الشات هروووب من واقع صعب
Post a Comment