!!!أخى العزيز ...كم أحتاج اليــك

بالرغم انى مش بحب اكتب بوستات عن نفسى كتير و بحس ان حياتى الشخصية مش هتكون مهمة ان حد يعرفها او فيها مايستحق النشر....لكن ساعات الواحد بيتخنق وفعلا بيكون عايز حد يسمعه...مش مهم حد يعلق عندى ولا حد يقول حاجة على كلامى ....لكن كفاية ان الواحد طلع الكلام اللى فى نفسه...

طبعا من العنوان واضح انى بتكلم على اخويا

.مع الاسف اخويا ده مش موجود

لالالالا

ماتفتكروش انه حصله حاجة...هو اصلا ماتوجدش لانى ماعنديش اخوات ولاد من الاصل
دايما من وانا صغيرة كنت بسمع صحابى البنات بيشتكوا من اخواتهم الولاد وكل واحدة تقعد تقول

ده احمد اخويا ده رخم اوى

والتانية تقول

ده عايز يعمل عليا راجل

وانا اقعد كده اقول لنفسى فعلا اللى فى ايده نعمة مش بيقدرها...وساعات كنت بحس بغيرة ...لما مثلا نكون متجمعين فى بيت واحدة مننا وواحدة مثلا تتاخر براحتها عادى وتقول اصل اخويا هيجى ياخدنى ...وانا اكون مضطرة انى اروح بدرى عشان ياما هروح لوحدى او بابا هيجى ياخدنى وهو بينام بدرى وماينفعش ينزلى مخصوص متاخر ...او مثلا الاقيها عاملة حساب لاخوها ...ونظام اصل اخويا زعقلى وقفش عليا

مع الاسف انا من زمااااااان وانا بحس باحتياج فظظظيع لحكاية الاخ دى ....

واللى زود الموضوع اكتر انى عمرى ماكان ليا زمايل ولاد فى المدرسة ...وفى الكلية بتبقى ظاهرة كونية تستحق الملاحظة لو حصل ويوم اتكلمت مع ولد فى دفعتى صدفة ....وكمان احنا مش قريبين من قرايبنا اوى و بنشوفهم فى الاعياد و المناسبات بس تقريبا عيلة رايحة النار فموضوع الاخوة ( اخوة ولد يعنى) و الحاجات دى معدوم عندى...اكتر وقت بقى حسيت انى فعلا فى امس الحاجة لاخ ولد يقولى اعمل ايه ...كانت فى مشكلة حصلالى من سنتين كده ...وكنت وقتها بجد ربنا عالم بيا و كنت حاسة انى لوحدى فى الدنيا دى ....وحسيت انى ماليش الا ربنا فعلا ...والحمد لله ربنا كريم و خلى الازمة دى تعدى ....بس انا وقتها فعلا حسيت يعنى ايه كلمة اخ يكون مسئول عن اخته ويساعدها فى مشاكلها..ممكن حد يقولى طب ماكنتى تروحى لباباكى تحكيله...هقولكوا ان انا و بابا علاقتنا مع بعض زى علاقة مئات الابهات المصريين مع عيالهم...مايعرفش حاجة عن مشاكلى او الحاجات اللى بتضايقنى ...بالرغم من انا وهو نبان صحاب و كده و ميولنا واحدة لكن ماتعودتش اروح احكيله عن حاجة مضيقانى او عن مشكلة عندى ...ويمكن ده كان سبب فى لجوئى للشات..وكنت بتكلم مع كل الناس ولاد و بنات...وكل واحد يقولى انتى زى اختى بالظبط...وفى الآخر طلعت بنتيجة مهمة ....ان مفيش حد كلمنى فى الشات اعتبرنى اخته وبيكلمنى لوجه الله وعرفت ان خلاص مستحيل يكون ليا اخ وقفلت مرحلة الشات دى نهائيا من حياتى

المهم هتقولولى وانتى جاية بعد 20 سنة تنوحى وتقولى انك عايزة اخ ولد اكبر منك ...هقولكوا ان انا كنت خلاص بتناسى الموضوع وبقول خلاص ده نصيبى بقى ...جت حصلت حاجة ..ماحدش يتصور جرحتنى اد ايه ...وحصلت من خلال المدونة دى ....كنت كتبت كلمة هنا وانا معرفش انها عيب كنت فكراها كلمة عادية وكنت كاتباها على سبيل التهريج وكنت بسمع كتير بيقولوها سواء ولاد او بنات وبقراها فى الجرايد ولولا انى عرفت انها عيب انا كنت كتبتها دلوقتى لانى كنت فكراها كلمة عادية...دخل هنا واحد مدون من طرف واحدة صحبتى وهى مدونة هى كمان ....المهم الولد ده جه علق عندى وقالى

ايه الكلمة دى !! انتى شكلك بتقعدى على قهاوى كتير ...

انا قلت هى الكلمة مالها ؟؟؟

جت صحبتى دى وقالتلى انه علق معاها على الكلمة وقالها

...انو مستنكر جدا ان الكلمة دى تطلع من بنت!! وانه مايرضاش لاخته او قريبته انها تقول او تقرا الكلام ده!!انا بالكلام ده حسيت ان حد جاب سكينة و جاب كرامتى نصين ....حسيت انى بجد وحيدة اوى ...وحسيت انى اتكسفت اوى وووشى ولع نار من الكسوف واللى هو يا ارض انشقى و ابلعينى
ومع وجع الكرامة بقى ..فكرة احتياجى لاخ ولد اكبر منى صحيت تانى ...وبجد بدأت احس انى وحيدة اوىىىى ومفيش حد ممكن يوجهنى ويقف معايا فى الدنيا دى...وكنت خلاص قربت اعيط ...فجيت كتبت البوست ده:(

اقولكوا على حاجة :ي

من كام سنة كده كنت بقعد اسرح مع نفسى و اتخيل زى ما بيحصل فى الافلام....ان الواحد على كبر كده يكتشف ان ليه اخ ولد من ام تانية ...نظام بقى بابا اتجوز على ماما زمان والاقى عندى مرة واحدة اخ كبير عنده بتاع 25 سنة مثلا ونبقى صحاب انا وهو واحكيله على كل حاجة مضيقانى واخد رايه فى كل حاجة

ههههههههه اوعوا حد يروح يقول لماما
يلا بقى معلش قلبتها غم انا المرادى ...بس اهو الواحد طلع الكلمتين اللى فى نفسه

ملحوظة
بليز مش عايزة فى الكومنتس نظام بقى اعتبرينى اخوكى و كده (طبعا كلنا اخوة فى الله ) واى حاجة عايزاها انا موجود وفى الخدمة ....بلاش تحسسونى انى صعبت عليكو و انكو هتلمولى عشان اعمل العملية:ي...

دى مجرد فضفضة مش اكتر

تحياتى ليكو كلكو

H@pPy R@m@d@n FoR @LL

كل سنة وكل البلوجرية طيبين

رمضان اهو جه يا ولاد ...حاسة انه جه بسرعة و فجأة

او يمكن انا مستغرباه عشان جه فى الصيف

بس بضايق لما ناس كتير تقعد تقول ان رمضان مابقاش زى زمان ..يا جماعة رمضان هو رمضان بكل خيره و بركته

سمعت رأى لعمر طاهر عجبنى اوى فى رمضان

كان بيعلق بردو على نفس المقولة اللى بتقعد تقول رمضان مش زى زمان

قال

كل رمضان ليه طعم وليه شكل ..مش ممكن هيكون فى رمضان زى رمضان

وشبه رمضان

( مع انى مابلعتش التشبيه اوى ) انه عامل زى قصص الحب

مفيش قصة زى التانية

يعنى رمضان بتاع المذاكرة و الامتحانات غير رمضان بتاع الاجازة

ورمضان بتاع البرد و التكتكة تحت البطانية قبل الفطار بربع ساعة غير رمضان اللى بنكون حرانين فيه وبنحلى بايس كريم بعد الفطار

رمضان بتاع فوازير نيلى وشريهان غير رمضان بتاع تامر وشوقية

فعلا كل رمضان وليه الجو بتاعه و الريحة بتاعة الشهر البركة اللى بتخليك ماشى حاسس انك مطمن و هادى

بصراحة انا كنت ناوية انى اكتب بوست ازاى نستعد لرمضان و كده

والعبادات اللى المفروض نعملها

بس فى ناس كتيرة اتكلمت فى النقطة دى احسن منى

ومش عايزة اقعد اعيد وازيد فى الكلام

لكن انا عايزة كل واحد يخش الشهر ده تحدى مع نفسه فى حاجة معينة

يعنى زى ما الكل عارف ان الشهر ده بيعلمك تمسك نفسك و تمنعها من حاجات حلال زى الاكل و الشرب

فمن باب اولى انك تمسك نفسك عن الحرام

طبعا انا كلى ذنوب مش جاية اعمل فيها الشيخ بلحة واقعد اقول ده حرام وده حلال

كل واحد عارف هو مهبب ايه فى عيشته :ي

عشان كده كل واحد لازم يركز كده مع نفسه

وياخد عهد مع نفسه انه هيبطل حاجة معينة و يكافح معاها طول الشهر وان شاء الله يلاقى نفسه ربنا تاب عنه بعد الشهر و يتخلص من الذنب ده

يعنى مثلا اللى مش بيصلى بانتظام ليه مايخدش الشهر ده تحدى مع نفسه؟

واهو الشيطان حاله واقف اليومين دول ومالوش كلام عليك :ي و سهل انك تتحكم فى نفسك

وتقوم نفسك للصلاة اول ما الاذان يأذن على طول

على فكرة انا بداية انتظامى مع الصلاة كانت مع رمضان

كنت وقتها فى خمسة ابتدائى وميس فاطمة بتاعة العربى ربنا يكرمها

قعدت تقولنا اللى مش بيصلى مالوش صيام

انا بقى صعب عليا صيامى اوى وقلت لازم بقى انتظم ومن ساعتها وانا الحمد لله بصلى

صدقنى هما اسبوعين تلاتة و هتلاقى الموضوع اتوماتيك كده اتبرمجت خلاص على الصلاة

ومثلا

اللى متعود يشوف حاجات مش تمام ....ليه مايخدش الشهر ده تدريب لعينه انها ماتشوفش الحرام

يعنى اكيد انت يا اللى بتشوف الحاجات دى مش وحش لدرجة انك بتشوفها وانت صايم

ليه بقى ماتخدش الموضوع تدريب ليك انك تمسك نفسك عن الحاجات دى

وتفتكر الحديث بتاع الرسول عليه افضل الصلاة والسلام

العين تزنى و زناها النظر

ومثلا

موضوع الاغانى

وفى الموضوع ده انا بخاطب نفسى اول واحدة

ليه ماندربش نفسنا اننا مانسمعش اغانى خالص فى رمضان

بصرف النظر عن الجدل حوالين حرمتها او حلالها

اكيد ماحدش ينكر ان الاغانى بتلهى شوية وبتخلى القلب غافل ومش حاسس بالقرآن

طبعا مش بتكلم عن الاغانى الدينية او اللى بتتكلم فى مواضيع عامة

انا بتكلم عن الرومانسية

ليه مانخدش الشهر ده تدريب على اننا نسمك شوية نفسنا قدام الاغانى ومش اى شريط جديد ينزل نريل عليه

اخر حاجة بقى و همشى على طول

القرآن يا جماعة

الكتاب اللى بيقعد عند كتير منا عليه تراب من رمضان لرمضان

مش المفروض بقى ده الموسم

ناوى تجيب كام خاتمة السنادى؟؟؟

بلاش يعدى عليك رمضان وانت ماجبتش خاتمة على الاقل

ده السيرزون يا اخى

ولو مش بتقدر تقعد تخلص جزء كده فى قاعدة واحدة فى اليوم

قسم الجزء

يعنى مثلا اقرالك 4 او 5 صفحات بعد كل صلاة او قبلها هتلاقى الجزء خلص معاك من غير ما تحس

و خد نية ان انت بتعود نفسك على قراية القران بعد رمضان ولو حتى بصفحة واحدة فى اليوم

بس اوعى تكون هاجر لكتاب ربنا ومش بتبص فيه غير من السنة للسنة

يلا يا جماعة

كل سنة وانتو طيبين

ورمــضــــــــ كريم ــــــــــــــــــــان

اسيبكو بقى مع شوية صور ....عشان تشوفوا شوشو بيعمل فينا ايه وبيضحك علينا ازاى ابن ال.... :ي

رايحة اذاكر مع صاحبى

الصــــــــــداقة

فى رأيى ان اول انطباع بيجى لكلمة صداقة فى ذهن الواحد اول ما بيسمع الكلمة دى

هو الصحبيه بين البنت للبنت والولد للولد.....لكن هل بقى بيجى فى ذهنك للوهلة الاول لكلمة صداقة

انها ما بين بنت و ولد؟؟؟؟؟

دى بقى نوعية الصداقة اللى انا جاية ارغى فيها النهاردة

بعيدا عن اى افكار او انتماءات او اى حاجة

نحلل كده الموضوع مع بعضنا واحدة واحدة

وهبدأ بسؤال ...ويمكن انا عملاه استفتاء على ايدك اليمين كده وانت قاعد ...

هو فعلا فى حاجة اسمها صداقة بين الولد و البنت

؟؟؟

طب هى الصداقة يعنى ايه

مش هقعد بقى اقول مصطلحات كبيرة و اسمع الكلمتين اللى اخدتهم فى الثانوية العامة فى النص بتاع جفاء الصديق بتاع بن المقفع والحورات دى

لا بالبلدى كده

يعنى ايه صديق بجد

؟؟؟

صديق

يعنىمعاه كل اسرارك

عمرك ما تتكسف منه

تحس ان انتو الاتنين نفس التفكير و الطباع

وقت ما تكون محتاجه تلاقيه

بتعرفه لوجه الله تعالى

مش عايز منه مصلحة ولا بتاع

صديق يعنى وقت لما تعوزه تلاقيه ....فى اى وقت وفى اى مكان

يعنى ممكن تهزر معاه هزار اوفر وواثق انه مستحيل هيزعل منك

حط كل شروط الصداقة دى بقى

وحاول تطبقها بين الولد والبنت

فى مجتمعتنا الشرقية اللى احنا عايشين فيها

ينفع اتنين يكونوا مطبيقين الشروط دى مع بعض 100%ولا لا

؟؟؟

مش هتكلم من الناحية الدينية دلوقتى

لان اصلا انا مش مؤهلة انى اتكلم فيها

لكن نتكلم الاول فى الناحية الاجتماعية

انت ايه رايك فى الصداقة بين الولد والبنت

يعنى لو كنت فى الكلية مثلا

ولاقيت بنت وولد قاعدين مع بعض لوحدهم ومندمجين مع بعض اوى فى الكلام

هيجى فى بالك ايه اول ماتشوفهم

انهم قاعدين بيفضفضوا لبعض عادى كاخوات وصحاب

ولا

عشان حاجات تانية

انا شخصيا اول انطباع بيكون بالنسبالى انهم اتنين مرطبتين

مش عارفة بقى دى نظرة محدودة ولا ايه

بس ده الانطباع اللى بيجيلى

طب مثلا

لو انت واقف كده ولاقيت واحد بيتكلم على ان راح المكان الفلانى مع زميلته يتفسحوا

اصدقاء بقى

انت بيكون ايه موقفك

؟؟؟

انا بحس ان ده غلط ....مش عارفة بقى انا بقى اللى دماغى متربسة و جاية من حلايب وشلاتين ولا الموضوع ده فعلا غلط؟؟؟

طب بلاش كل ده لو مثلا فى شغلك لاقيت موظف و موظفة قاعدين ماسكين ودن بعض ودودة وماحدش عارف هما بيقولوا ايه ...وعلى الحال ده على طول...

ايه اللى بيجى فى نفوخ حضرتك

بتتبسط وتمصص شفايفك وتقول يا سلام

ونعم الصداقة

ولا

بتقول مالهم دول

؟؟؟

انا شايفة ان صعب فى مجتمعنا ان الصداقة بين الولد والبنت تكون مقبولة

يعنى لو حضرتك من انصار الراى اللى بيقول

ان في حاجة اسمها صداقة بين الولد والبنت

بذمتك كده

هتكون موافق ان اختك او بنتك يكون ليها صديق

وانا بقول صديق مش زميل

فيه فرق كبير بين الكلمتين

يعنى تكون قاعد

تلاقى بنتك جاية تقولك

بابا انا رايحة اذاكر مع تامر صحبى

وقتها هتقولها ماشى يا حبيبتى بس ماتتأخريش

ولا

هتقوم تجبها من شعرها وتطلع المقرر على جتتها صفحة صفحة؟؟؟

او مثلا تتدخل على اختك الاوضة تلاقيها ماسكة التليفون ونازلة رغى

بتكملى مين

ده مصطفى صاحبى

هتقولها سلميلى عليه وتاخد الباب فى ايدك وانت ماشى

ولا هتكسر التليفون على دماغها ودماغ مصطفى

يا ريت نكون صرحة مع بعض

يعنى مايجيش واحد يقولى

لا طبعا فى حاجة اسمها صداقة بين الولد والبنت

ولو سالته ترضى كده لاختك

يتحمق اوى ويقولك

لا طبعا بس

انا ضامن نفسى وعارف انى بتقى الله فى بنات الناس لكن مش ضامن غيرى

يا ريت بلاش المعايير المزدوجة دى

طب بلاش كل ده نفترض ان الموضوع مش هيكون اعتراض من الاب او الاخ و كده

احنا يا بنات من نفسويتنا كده:ي

تقدرى تحكى كلللللللللل حاجة فى حياتك و يومك العادى لولد انتى معتبراه صديقك زى ما بتحكى كل حاجة لصحبتك؟؟؟؟؟

اكيد مستحيل لو حلفتيلى على المية تجمد

والا تكونى واحدة معندهاش ريحة الحياء

طب نيجى بقى للناحية الدينية

زى مانا قلت انا مش عايزة افتى من عندى واقعد اتكلم فى الدين وانا مش متخصصة فيه

لكن انا هتكلم بالسينس كده و الفطرة

يعنى ربنا بيأمرنا بغض البصر ..هل ده ينفع يطبق على الصديق؟؟...يعنى اكون بكلمه وانا مودية وشى الناحية التانية...طب ده انتى حتى ماينفعش تصلى قدامه!!! وده ايه صديقققق

يعنى المفروض بتقضى معاه معظم الاوقات

والله يا جماعة انا مش معقدة ...بس انا من اللى بشوفه فى الكلية

بحس ان فى هبل مرشوش فى الجو

البنت تهزر مع الولد بالايد عادى جدا

والولد يشدها من ايدها و الطرحة

يقعدوا لازقين فى بعض ...مش بيكون فيه 2ملليميتر هوا

بجد حاجات عجيبة

بكون ماشية اقول

اكيد بقى انا اللى غلط

والمصيبة ان لو جيت كلمت واحد فيهم كده

يتحمق اوى و يقولك

احنا زمايل

يا نهار ازرق

زمايل اومال لو اصدقاء هتعملوا ايه

؟؟؟

وبعدين فى جملة شائعة اوى تقولك ..احنا اصدقاء بس بنتعامل بحدود

طب ماشى هفترض ان فيها حاجة اسمها صداقة بحدود

مين بقى اللى بيحدد الحدود دى؟؟ ...والحدود دى شىء نسبى ولا مطلق؟؟؟

يعنى مثلا فى ناس شايفين ان حدود الصداقة انهم مثلا مايتكلموش بعد10بليل

وفى ناس تكون واخدة موضوع المواعيد ده عادى جدا يقولولك ماهى كلها اوقات ربنا

شوف الايمان

وفى ناس تكون شايفة انهم مايسلموش على بعض بالايد وفى ناس موضوع الهزار و التهريج بالايدين ده عادى جدا

انا شايفة ان كلمة حدود دى لفظ مطاطى بلغة القانون

يعنى مش محدد وواضح وممكن يتفسر على مزاج كل واحد

عموما ملخص الرغى ده كله

انا بشوف ان مفيش حاجة اسمها صداقة بين الولد والبنت

وان اقصى حاجة بتكون بينهم

هى زمالة ليس الا

وبتكون فى اطار معين

يعنى اطار كلية -شغل

وبيكون فى حدود الموضوع

مجرد احترم متبادل و كلام عام و خلصنا

انما بقى رغى وتليفونات و خروجات

ده بصراحة اللى مش ببلعه

وبعتبر ان الصديق

حبيب محتمل

و بحس ان اللى بيخليهم من بعض قريبين اوى كده

هو الشعور الفطرى اللى جوا كل واحد فيهم بالميل ناحية الجنس التانى

لكن صداقة بمعناها المجرد

ماعتقدششش

يا ريت يا جماعة اشوف ارائكوا فى الكومنتس

وكل واحد يقولى هو شايف الصداقة صح ولا غلط و يشرحلى اسبابه

ويا ريت كمان تصوتوا فى الاستفتاء عشان اعرف احدد النسب

وتنويه اخير...يا جماعة رأيى ده اكيد زى اى حاجة تانية فى الدنيا تحتمل الصواب و الخطأ..

يعنى مش قصدى اجرح فى حد ...واى حد مقتنع بموضوع الصداقة بين الولد و البنت ..اكيد وجهة نظره تحترم و احب اشوفها وجهة نظره فى الكومنتس