كل سنة وكل البلوجرية طيبين
رمضان اهو جه يا ولاد ...حاسة انه جه بسرعة و فجأة
او يمكن انا مستغرباه عشان جه فى الصيف
بس بضايق لما ناس كتير تقعد تقول ان رمضان مابقاش زى زمان ..يا جماعة رمضان هو رمضان بكل خيره و بركته
سمعت رأى لعمر طاهر عجبنى اوى فى رمضان
كان بيعلق بردو على نفس المقولة اللى بتقعد تقول رمضان مش زى زمان
قال
كل رمضان ليه طعم وليه شكل ..مش ممكن هيكون فى رمضان زى رمضان
وشبه رمضان
( مع انى مابلعتش التشبيه اوى ) انه عامل زى قصص الحب
مفيش قصة زى التانية
يعنى رمضان بتاع المذاكرة و الامتحانات غير رمضان بتاع الاجازة
ورمضان بتاع البرد و التكتكة تحت البطانية قبل الفطار بربع ساعة غير رمضان اللى بنكون حرانين فيه وبنحلى بايس كريم بعد الفطار
رمضان بتاع فوازير نيلى وشريهان غير رمضان بتاع تامر وشوقية
فعلا كل رمضان وليه الجو بتاعه و الريحة بتاعة الشهر البركة اللى بتخليك ماشى حاسس انك مطمن و هادى
بصراحة انا كنت ناوية انى اكتب بوست ازاى نستعد لرمضان و كده
والعبادات اللى المفروض نعملها
بس فى ناس كتيرة اتكلمت فى النقطة دى احسن منى
ومش عايزة اقعد اعيد وازيد فى الكلام
لكن انا عايزة كل واحد يخش الشهر ده تحدى مع نفسه فى حاجة معينة
يعنى زى ما الكل عارف ان الشهر ده بيعلمك تمسك نفسك و تمنعها من حاجات حلال زى الاكل و الشرب
فمن باب اولى انك تمسك نفسك عن الحرام
طبعا انا كلى ذنوب مش جاية اعمل فيها الشيخ بلحة واقعد اقول ده حرام وده حلال
كل واحد عارف هو مهبب ايه فى عيشته :ي
عشان كده كل واحد لازم يركز كده مع نفسه
وياخد عهد مع نفسه انه هيبطل حاجة معينة و يكافح معاها طول الشهر وان شاء الله يلاقى نفسه ربنا تاب عنه بعد الشهر و يتخلص من الذنب ده
يعنى مثلا اللى مش بيصلى بانتظام ليه مايخدش الشهر ده تحدى مع نفسه؟
واهو الشيطان حاله واقف اليومين دول ومالوش كلام عليك :ي و سهل انك تتحكم فى نفسك
وتقوم نفسك للصلاة اول ما الاذان يأذن على طول
على فكرة انا بداية انتظامى مع الصلاة كانت مع رمضان
كنت وقتها فى خمسة ابتدائى وميس فاطمة بتاعة العربى ربنا يكرمها
قعدت تقولنا اللى مش بيصلى مالوش صيام
انا بقى صعب عليا صيامى اوى وقلت لازم بقى انتظم ومن ساعتها وانا الحمد لله بصلى
صدقنى هما اسبوعين تلاتة و هتلاقى الموضوع اتوماتيك كده اتبرمجت خلاص على الصلاة
ومثلا
اللى متعود يشوف حاجات مش تمام ....ليه مايخدش الشهر ده تدريب لعينه انها ماتشوفش الحرام
يعنى اكيد انت يا اللى بتشوف الحاجات دى مش وحش لدرجة انك بتشوفها وانت صايم
ليه بقى ماتخدش الموضوع تدريب ليك انك تمسك نفسك عن الحاجات دى
وتفتكر الحديث بتاع الرسول عليه افضل الصلاة والسلام
العين تزنى و زناها النظر
ومثلا
موضوع الاغانى
وفى الموضوع ده انا بخاطب نفسى اول واحدة
ليه ماندربش نفسنا اننا مانسمعش اغانى خالص فى رمضان
بصرف النظر عن الجدل حوالين حرمتها او حلالها
اكيد ماحدش ينكر ان الاغانى بتلهى شوية وبتخلى القلب غافل ومش حاسس بالقرآن
طبعا مش بتكلم عن الاغانى الدينية او اللى بتتكلم فى مواضيع عامة
انا بتكلم عن الرومانسية
ليه مانخدش الشهر ده تدريب على اننا نسمك شوية نفسنا قدام الاغانى ومش اى شريط جديد ينزل نريل عليه
اخر حاجة بقى و همشى على طول
القرآن يا جماعة
الكتاب اللى بيقعد عند كتير منا عليه تراب من رمضان لرمضان
مش المفروض بقى ده الموسم
ناوى تجيب كام خاتمة السنادى؟؟؟
بلاش يعدى عليك رمضان وانت ماجبتش خاتمة على الاقل
ده السيرزون يا اخى
ولو مش بتقدر تقعد تخلص جزء كده فى قاعدة واحدة فى اليوم
قسم الجزء
يعنى مثلا اقرالك 4 او 5 صفحات بعد كل صلاة او قبلها هتلاقى الجزء خلص معاك من غير ما تحس
و خد نية ان انت بتعود نفسك على قراية القران بعد رمضان ولو حتى بصفحة واحدة فى اليوم
بس اوعى تكون هاجر لكتاب ربنا ومش بتبص فيه غير من السنة للسنة
يلا يا جماعة
كل سنة وانتو طيبين
ورمــضــــــــ كريم ــــــــــــــــــــان
اسيبكو بقى مع شوية صور ....عشان تشوفوا شوشو بيعمل فينا ايه وبيضحك علينا ازاى ابن ال.... :ي
18 comments:
و انت طيبة يا نرمين و ربنا يقدرنا على الصيام و القيام و قراءة القران و يتقبل منا و منكي
اوروفوار
يارب يهدينا
عارفة يانوني
طلع الناس اللي ولا هما منهم متدين ولا منهم منحرفين اية
منافقيننننننننن
انا اتصدمت
يعني لما احنا بنحس اننا عايزين نبقي كويسين وتلاقي حاجات بتخلينا ولو لحظة وحشين نبعد عنها احسن نبقي منافقين
ربنا قال ولا هولاء ولا هولاء
يارب نبقي عارفين راسنا من رجلينا
ومنبقا مذبذبين كدا
ونؤمن ببعض ونفكر ببعض
لان طبعالما ربنا بيقول مثلا اتحجبي واحنا متحجبناش بس بنصلي
يبقي بنؤمن ببعض ونفكر ببعض
نقول اصلي مش مقتنعة اصلي مش عايزة حد يغصب عليا
اصل اي سبب تافة
دة اسمة كفر ما نهاكم عنة الله ورسولة فا نتهو
وجزاكي الله خير
سلام
رمضان كريم
ربنا يجعله في ميزان حسانتك
تحياتي
عزيزتى
كل سنه وانتى طيبه
ويارب نقدر نعمل خير كتير فى الشهر ده علشان احنا محتاجين حسنات كتير اوى
جميل كلامك بس المهم اللى يقدر ويفهم
تحياتى
سلام
على فكره يا نرمين انتى عندك اسلوب حلو قوى فى الدعوه لاى حاجه و ده بالتالى وضح فى البوست ده يعنى انتىت دعيتى لحاجات كتير قوى حلوه جدا خصوصا فى الشهر الكريم ده و ده كان باسلوب مش منفر زى ما كتير بيعملوا
ربنا يلهمنا فعلا التوبه و الخروج من دايره المعاصى اللى بتحيك بينا فى الايام العاديه على الاقل كل واحد محكوم باعمله فى الشهر ده
خاب و خسر من ادرك رمضان و لم يغفر له
تحيات ى ليكى جدا
على فكره انا بوستى الجديد نزل
مستنيكى بقى
كل سنه وانتي طيبة يا نرمين
ويعود عليكي رمضان بخير
تحياتي
رمضان كريم
اللهم بلغنا رمضان
------------------
مبروك للاهلى
يارب عقبال لماتش الأتحاد
ربنا يستر
كل سنة وانت طيبة
كلامك جميل وبجد انت لخصتي فعلا حاجات كتير من المفروض اننا نحطها من أولويات حياتنا في رمضان وغير رمضان
وربنا يكرم الجميع
وطبعاً الصور تحفه
هههههههههههههه
شكراً لمتابعتك ليه
وانا مقفلتش المدونة ولا حاجة
بس انا مشغول جدا ورمضان وقته ضيق قوي
فصعب أتابع شوية
وقريب تقري البوست الجديد
وتنوريني
كل سنه والجميع بخير
بس بجد رمضان فعلا اتغير جدا عن زمان
وربنا يعيده علينا دايما بكل خير
رمضان كريم وكل سنة وانتي طيبة وبجد كلمك في البوست دة جميل جدا
والف مبروك للاهلي الفوز علي غريمة التقليدي الزمالك بما ان انتي اهلاوية
فعلاً كل رمضان كل غير رمضان قبل كدة لكن برضه مش زمان في إنه بينزل لتحت منحنى الطاعات والجو الرمضاني نفسه يمكن مع ناس وناس لكن أكيد في ناس لسة محافظة لكن أنا قصدي على الجو العام بس البوست ده كله كتبتيه في أد إيه؟ .. رمضان كريم وكل سنة وانتي طيبة
إزيك انتي ؟ انا الحمد لله
أشكرك جداً لاهتمامك ويارب متكونش آخر زيارة وكويس إنك معايا في موضوع إيران ده قولي بقى لـ "My Hope$" علشان مستغربة من الإجابة دي أتمنى متمانعيش أضمك لقائمة عالمي
شكراً وكل سنة وانتي طيبة
و الله احلى موضوع قريته عن رمضان
بجد مش مدح يعنى و خلاص عشان تخشى المدونه بتاعتى
لا ابدا والله
بس برضه عايزك تخشى على مدونتى
تنورينى
السلام عليكم
أحم
انا مقصر قوي معاكي يا نرمين
المهم كيف حالك كده في رمضان
يا رب تكوني بخير وشاده حيلك
علي فكره
يا عبد صمت عن الحلال في نهار رمضان وترفض ان تصوم عن الحرام في ليله
مأخوذ من شيخ
مش هذكر اسمه احسن تقولوا دعايه
بس شوية صور في الجون
تحياتي
كل عام وانتم بخير
والى الله اقرب
وعلى طاعتة ادوم
والى فعل الخيرات اسبق
القسام
مدونتك حلوة بجد يانرمين
دى اول زيارة ليا لمدونتك لكنى خدت انطباع حلو يخلينى اكرر الزيارات
بالحق فيه هدية ليكى عندى فى مدونتى ياريت تيجى تاخديها
انا مش حرضى الا انك تاخدى الهدية ومستنى ردك
اتمنى دوام التواصل
وتحياتى ليكى
لصاحب المدونه وكل زواره
أدعوكم لإبداء الرأي والمشاركه في فوازير رمضان الإسلاميه بعنوان خلق وصحابي
Post a Comment