تالت العالم هيلاعب تانى العالم...وعجبى

بكتب دلوقتى البوست ده وانا لسه فيا نشوة النصر اللى حققه الاهلى من كام ساعة على صان داونز..اظرف حاجة ان المدير الفنى بتاع صان داونز كان عمال يتوعد الاهلى بتصريحات مستفزة قبل الماتش وقال بيقول اننا هنام من

الساعة 10 من الحسرة على الاهلى...واهو الحمد لله فزنا و ادينى بكتب البوست الساعة تلاتة صباحا.. وكمان كان بيقول اتينا للقاهرة لاقصاء الاهلى

يلا ما علينا

اكيد لما اقول ان الاهلى هيلاعب برشلونة التلات الجاى ان شاء الله مش هكون جبت التايهة يعنى وماقلتش حاجة جديدة..بس انا بصراحة مقدرش بعد اكتر شهر من عملى للبلوج ده انى ماكتبش ولا بوست عن الاهلى حبى الاول والاخير!!!! يمكن سر حبى ليه ان الاهلى الحاجة الوحيدة اللى حطيت ثقتى فيها وماخذلتنيش

يلا ربنا ان شاء الله مع الاهلى يوم التلات والاهلى يعنى قبل كده عملها وكسب ريال مدريد ان شاء الله نحقق الصعب ونكسب برشلونة.وحتى لو خسرنا المفروض اننا مانزعلش (هزعل بس هحاول مازعلش اوى) لان ده ماتش ودى وكمان الكورة مش عافية يعنى اكيد فى فرق امكانيات وقدرات...يلا بقى تشجيعة كده على الماشى نقولها لو الاهلى كسب او خسر

لا تقولى زمالك ولا برشلونة...لاعيبة الاهلى شرفونا(لانهم ان شاء الله اكيد هيشرفونا)

*********************************

تحديث بعد الماتش الساعة صباحا2:36

*********************************

احم احم يؤسفنى ان اعلن هزيمة الاهلى الطاحنة باربعة اهداف نظيفة امام برشلونة:(:( حقيقى الواحد كان قاعد فى حالة ذهول ...اينعم انا معنوياتى كانت فى الارض اصلا من قبل ما الماتش يبدأ ،من اول ما اعلنوا ان برشولنة هتلعب بفريق الشوط الاول وفريق الشوط التانى ولا قيت انهم منزلين الاشبال بتوعهم الشوط الاول ،يعنى بيجربوا اللعيبة فيناا(شوفتوا الثقة)قلت بس دول بيقسموا علينا ..قلت انهم بيدونا فرصة كمجاملة يعنى اننا نجيب جون ولا حاجة عشان نعمل منظر يعنى(بفلوسنا يا خاونة) وبعدين هينزلوا يكبسوا علينا برونالدنهيووصامويل ايتو وبقية الحبايب الشوط التانى،لكن مع الاسف ضيعنا فرص كتير ومعرفش متعب ليه مش عايز يبطل هوايته المشهورة انو يشوط فى الهوا وبعدها يقعد على الارض..لييه لييه يا متعب ارحمنا بقى ...وفلافيو النهاردة معرفش يظهر وحشه فلافيو بتاع زمان كان عجيب بجد كنت حاسة انه مش معانا خالص...لكن مع الاسف قطعونا والحضرى كمان شال تلت كور كانوا داخلين داخلين فينا..يلا بقى مش هنبكى على اللبن المسكوب ..بعد الماتش كنت حاسة باحباط كبير اوى مش عشان الاهلى اتغلب بس ...انا قعدت افكر ليه هما احسن مننا فى كل حاجة...بجد فى كل حاجة مفيش حاجة احنا فالحين فيها...كنت حاسة باحباط اوى ..الناس دى فعلا ليهم حق يحتقرونا ويبصولنا من فوق..مش اسبانيا بس الغرب عموما احنا

لا فالحين فى سياسة ولا فى فن ولا فى علم حتى الكورة ..بالذمة عمر قبل كده دولة عربية اخدت كاس العالم فى الكورة؟؟..فى دولة عربية وصلت للمربع الذهبى؟؟؟ ...يلا بقى ربنا يتولانا برحمته

بس ان جيتوا للحق الماتش كله بكل اللى حصل فيه كوم واللقطة الحضارية كوم تانى خالص

ههههههههههه

اكيد اللى شاف الماتش وسمع مدحت شلبى عارف ايه هى اللقطة الحضارية

اللقطة الحضارية كانت ان الريس حسنى مبارك كان قاعد وحاطط حفيده على رجله...نفسى اعرف ايه اللى حضارى فى اللقطة ...طبعا كل مذيع كان بينتهز اى فرصة عشان يوالس وينافق بأى حاجة ...فى اللى قال اول ما عرف ان الريس هيجى الماتش"كده الفرحة كملت"وفى

كتير اتكلموا عن الريس...لكن بصراحة مدحت شلبى اتحفنا بالتعبير ده ..بجد قعدت اضحك اوى ... ممكن تكون اللقطة دى بتشرحلى سؤالى ليه هما احسن مننا فى كل حاجة

على فكرة انا كلامى ده مش قصدى اقلل من الاهلى ..الى حصل النهاردة كان الفرق الطبيعى والفجوة الكبيرة اللى بينا وبينهم ..اعتقد لو اى فريق غير الاهلى النهاردة بيلاعبهم كان طلع من الماتش ده وداخل فيه 6 اجوان على الاقل..ما هو انا اكتر حاجة محبطانى انهم كانوا بيلاعبوا بطل مصر وافريقيا وعملوا فيه كده:(

بيب :(بيب:( اهلىىىىىىى