بالرغم انى مش بحب اكتب بوستات عن نفسى كتير و بحس ان حياتى الشخصية مش هتكون مهمة ان حد يعرفها او فيها مايستحق النشر....لكن ساعات الواحد بيتخنق وفعلا بيكون عايز حد يسمعه...مش مهم حد يعلق عندى ولا حد يقول حاجة على كلامى ....لكن كفاية ان الواحد طلع الكلام اللى فى نفسه...
طبعا من العنوان واضح انى بتكلم على اخويا
.مع الاسف اخويا ده مش موجود
لالالالا
ماتفتكروش انه حصله حاجة...هو اصلا ماتوجدش لانى ماعنديش اخوات ولاد من الاصل
دايما من وانا صغيرة كنت بسمع صحابى البنات بيشتكوا من اخواتهم الولاد وكل واحدة تقعد تقول
دايما من وانا صغيرة كنت بسمع صحابى البنات بيشتكوا من اخواتهم الولاد وكل واحدة تقعد تقول
ده احمد اخويا ده رخم اوى
والتانية تقول
ده عايز يعمل عليا راجل
وانا اقعد كده اقول لنفسى فعلا اللى فى ايده نعمة مش بيقدرها...وساعات كنت بحس بغيرة ...لما مثلا نكون متجمعين فى بيت واحدة مننا وواحدة مثلا تتاخر براحتها عادى وتقول اصل اخويا هيجى ياخدنى ...وانا اكون مضطرة انى اروح بدرى عشان ياما هروح لوحدى او بابا هيجى ياخدنى وهو بينام بدرى وماينفعش ينزلى مخصوص متاخر ...او مثلا الاقيها عاملة حساب لاخوها ...ونظام اصل اخويا زعقلى وقفش عليا
مع الاسف انا من زمااااااان وانا بحس باحتياج فظظظيع لحكاية الاخ دى ....
واللى زود الموضوع اكتر انى عمرى ماكان ليا زمايل ولاد فى المدرسة ...وفى الكلية بتبقى ظاهرة كونية تستحق الملاحظة لو حصل ويوم اتكلمت مع ولد فى دفعتى صدفة ....وكمان احنا مش قريبين من قرايبنا اوى و بنشوفهم فى الاعياد و المناسبات بس تقريبا عيلة رايحة النار فموضوع الاخوة ( اخوة ولد يعنى) و الحاجات دى معدوم عندى...اكتر وقت بقى حسيت انى فعلا فى امس الحاجة لاخ ولد يقولى اعمل ايه ...كانت فى مشكلة حصلالى من سنتين كده ...وكنت وقتها بجد ربنا عالم بيا و كنت حاسة انى لوحدى فى الدنيا دى ....وحسيت انى ماليش الا ربنا فعلا ...والحمد لله ربنا كريم و خلى الازمة دى تعدى ....بس انا وقتها فعلا حسيت يعنى ايه كلمة اخ يكون مسئول عن اخته ويساعدها فى مشاكلها..ممكن حد يقولى طب ماكنتى تروحى لباباكى تحكيله...هقولكوا ان انا و بابا علاقتنا مع بعض زى علاقة مئات الابهات المصريين مع عيالهم...مايعرفش حاجة عن مشاكلى او الحاجات اللى بتضايقنى ...بالرغم من انا وهو نبان صحاب و كده و ميولنا واحدة لكن ماتعودتش اروح احكيله عن حاجة مضيقانى او عن مشكلة عندى ...ويمكن ده كان سبب فى لجوئى للشات..وكنت بتكلم مع كل الناس ولاد و بنات...وكل واحد يقولى انتى زى اختى بالظبط...وفى الآخر طلعت بنتيجة مهمة ....ان مفيش حد كلمنى فى الشات اعتبرنى اخته وبيكلمنى لوجه الله وعرفت ان خلاص مستحيل يكون ليا اخ وقفلت مرحلة الشات دى نهائيا من حياتى
المهم هتقولولى وانتى جاية بعد 20 سنة تنوحى وتقولى انك عايزة اخ ولد اكبر منك ...هقولكوا ان انا كنت خلاص بتناسى الموضوع وبقول خلاص ده نصيبى بقى ...جت حصلت حاجة ..ماحدش يتصور جرحتنى اد ايه ...وحصلت من خلال المدونة دى ....كنت كتبت كلمة هنا وانا معرفش انها عيب كنت فكراها كلمة عادية وكنت كاتباها على سبيل التهريج وكنت بسمع كتير بيقولوها سواء ولاد او بنات وبقراها فى الجرايد ولولا انى عرفت انها عيب انا كنت كتبتها دلوقتى لانى كنت فكراها كلمة عادية...دخل هنا واحد مدون من طرف واحدة صحبتى وهى مدونة هى كمان ....المهم الولد ده جه علق عندى وقالى
ايه الكلمة دى !! انتى شكلك بتقعدى على قهاوى كتير ...
انا قلت هى الكلمة مالها ؟؟؟
جت صحبتى دى وقالتلى انه علق معاها على الكلمة وقالها
...انو مستنكر جدا ان الكلمة دى تطلع من بنت!! وانه مايرضاش لاخته او قريبته انها تقول او تقرا الكلام ده!!انا بالكلام ده حسيت ان حد جاب سكينة و جاب كرامتى نصين ....حسيت انى بجد وحيدة اوى ...وحسيت انى اتكسفت اوى وووشى ولع نار من الكسوف واللى هو يا ارض انشقى و ابلعينى
ومع وجع الكرامة بقى ..فكرة احتياجى لاخ ولد اكبر منى صحيت تانى ...وبجد بدأت احس انى وحيدة اوىىىى ومفيش حد ممكن يوجهنى ويقف معايا فى الدنيا دى...وكنت خلاص قربت اعيط ...فجيت كتبت البوست ده:(
ومع وجع الكرامة بقى ..فكرة احتياجى لاخ ولد اكبر منى صحيت تانى ...وبجد بدأت احس انى وحيدة اوىىىى ومفيش حد ممكن يوجهنى ويقف معايا فى الدنيا دى...وكنت خلاص قربت اعيط ...فجيت كتبت البوست ده:(
اقولكوا على حاجة :ي
من كام سنة كده كنت بقعد اسرح مع نفسى و اتخيل زى ما بيحصل فى الافلام....ان الواحد على كبر كده يكتشف ان ليه اخ ولد من ام تانية ...نظام بقى بابا اتجوز على ماما زمان والاقى عندى مرة واحدة اخ كبير عنده بتاع 25 سنة مثلا ونبقى صحاب انا وهو واحكيله على كل حاجة مضيقانى واخد رايه فى كل حاجة
ههههههههه اوعوا حد يروح يقول لماما
يلا بقى معلش قلبتها غم انا المرادى ...بس اهو الواحد طلع الكلمتين اللى فى نفسه
ملحوظة
بليز مش عايزة فى الكومنتس نظام بقى اعتبرينى اخوكى و كده (طبعا كلنا اخوة فى الله ) واى حاجة عايزاها انا موجود وفى الخدمة ....بلاش تحسسونى انى صعبت عليكو و انكو هتلمولى عشان اعمل العملية:ي...
يلا بقى معلش قلبتها غم انا المرادى ...بس اهو الواحد طلع الكلمتين اللى فى نفسه
ملحوظة
بليز مش عايزة فى الكومنتس نظام بقى اعتبرينى اخوكى و كده (طبعا كلنا اخوة فى الله ) واى حاجة عايزاها انا موجود وفى الخدمة ....بلاش تحسسونى انى صعبت عليكو و انكو هتلمولى عشان اعمل العملية:ي...
دى مجرد فضفضة مش اكتر
تحياتى ليكو كلكو
19 comments:
انا كتير كنت بتمنى يكون ليا أخت
بس كنت بشوف اصحابي مع اخواتهم البنات لازم يوديها ويجبها سواء في درس او خارجة وسعات يكون معاها صاحبتها اللي هما البنات اخوات بقيت اصحبنا الولاد فيوديهم ويرجع يجبهم ويبقي عندوا شعور عظيم انه السواق بتاعهم
ولو حد اخته عازت حاجة بالليل بيروح يجبهلها حتي لو كان كيس شبسي او ملزمة ليليه أمتحان ووووو
بس كل دا شايفه كويس مش وحش لانهم مع بعض اصحاب
طيب لو مكنوش اصحاب فكرت مع نفسي لو ليا اخت ومختلفين مع بعض وبقي ليها تصرفات متعجبنيش ومش بتقنع بكلامي
هيكون الحال ايه ساعتها؟؟
نفس الكلام للبنت لو ليها اخ واخلاقة مش كويسه او مش بيحافظ عليها .. وكلمة مش بيحافظ عليها دي وراها كتير أوي
فالحمد لله شئ مش موجود مفتقده أجن من شئ موجود ويأذيني
أما موضوع الكمنت دا فمتحطهش في دماغك في شخصيات كتير فمية بتدي لنفسها الحق في انها تعمل حاجات وتستنكرها علي غيرها ومتعرفيش مين عينهم حكام علي البشر
ربنا يرزقك ويعوضك باللي أكتر وأقرب من الأخ
دائماً ما نعترف في داخلنا في العديد من الأوقات
أننا حمقى
لا نشعر بما حولنا من أشياء جميلة إلا عندما تضيع أو تختفي ومن هنا يبدأ الرثاء
وما نسميه دائماً
بالذكريات الجميلة
عارفة يا نرمين ان الأيام دايماً اللي بتمر علينا في البيت أو الكليه أو الحياه عامة مبنحسش فيها بأي حاجة مبهرة أو ملفتة
بتعدي كمجرد أيام وتموت
لما بتنتهي حياة الجامعه
بنقول انها كانت أيام جميلة ومش هتتعوض
انت كلامك جميل ويدل انك انسانة حساسة قوي
مش هقولك اعتبريني اخوكي ولا الكلام ده
:)
هقولك بس ان ربنا مرزقكيش بأخ
ورزق بنات كتير غيرك بأخوات
لكن ربنا أكيد اداكي حاجة جميلة
مش موجودة عند كتير غيرك
بصي حواليكي
واستكشفي الحاجات الحلوة اللي موجودة
هي كتير جدا
ربنا بيدينا حاجات كتير جميلة
ركزي قوي في اللي حواليكي
وفكري فيها
ومتضيعيش جمال الأشياء اللي بين اديكي
في رثاء أشياء لم تكن يوماً لك
ربنا يوفقك
بصراحة جيت اعلقلك لقيت ان اتين من الرجال علقولك احسن تعليقات
لا تلومى الاخرين على صغر عقولهم ولتعلمى ان لكى رب كريم عظيم كبير يعلم ما هو خير لكى واعطاكى كل الخير الذى يمكنك من ان تعيشى باحسن شكل
اقولك على حاجة ممكن توجعك بس سامحينى علشان تقدرى اللى انتى فيه وتعرفى ان نعم ربنا مبتنتهيش
انت نفسك جدا يكون ليكى اخ - طيب تفتكرى لو ربنا أعطاكى هذا الأخ وأصبحتى لا قدر الله يتيمة الاب او الأم - تأكدى ان شعور اليتم صعب للغاية فلتحمدى الله على نعمة الجليلة ولتحاولى جاهدة بمقدار شوقك لوجود اخ ان تسترجعى علاقتك بابيك ولتجعليها علاقة قوية وثيقة اما الجميع واهمهم اما نفسك
لو حبيتى نتكلم اكتر اعمليلى اد عالايميل بتاعى فى المدونة
تحياتى ويارب تكونى بخير
نقطة اخيرة - اللى عقب على كلمتك - واللى بيقول بتقعدى على قهاوى هو برده اخ وهو من اللى طلع الكلام ده وجابهولنا لغاية البيوت - يعنى هما سبب - عاوزاكى قوية متتهزيش قدام ناقصى العقل مهما حدث - انت قوية ومتربية كويس متخليش اى حد دماغه بايظة يلعب بمبادئك
سلامى -- هبة
ايه ده!!!!!!!!!!
انا قرأت وانا مذهوله
فعلا بجد
انا في الاول قلبي وقع في رجليا وقلت ايه ده
في حد واخد كلام ليا كوبي وبيست ولا ايه؟
كملت لاقيته مش كلامي
بكمل تاني لاقيتها اصلا افكاري
هههههههههههه
فكرة ان في حد بيقرا افكاري اللي كانت بتجيلي وانا صغيره رجعت تاني هههههههههههههه
سبحان الله
بس ماحصليش الموقف ده
مش عارفه اقولك ايه...اللي قبلي قالوا كل اللي اقدر اقوله واكتر
بس في حاجه
انا عندي اخ اصغر..
مشكلته انه سلبي بطريقه ماحدش يتخيلها..وقت فات كنت لما اشتكي من سلبيته وانه عمره ماتكلم ولا عمره حتى ماعتبر نفسه مسئول عننا حتى لو احتاجنا حاجه ف وقت ضيق..وان كانت بسيطه...كانوا بيقولولي انتي مستعجله عليه كده ليه؟يابنتي ده لسه صغير!!!!
والايام تعدي ولغاية دلوقتي بيقولوا لسه صغير
صحيح هو اه مادخلش في العشرينات بس على ما اعتقد ان التمييز بيبتدي قبل كده بكتير
بشوف كتير ولاد بيحسوا بالمسئوليه وانهم رجاله من وهم صغيرين اوي..مش شرط انهم يقدروا عليها بس على الاقل بيتمنوها
انما اخويا لأ..
مكبر دماااااغه وعايش الحياة
من كتر ماقالولي صغير اتمنيت ان يكون ليا اخ كبير..
والله عمري ماكنت هاتحوج لحد ولا حتى هاحس بالاحتياج لده واعوضه عن اي طريق ههههههه ومش بعيد اعنس وماتجوزش ههههههههه
كنت هاحبه اوي والله
بس يلا بقى
ربنا يهدي اخويا
واهو ابتدا الى حد ما يتصلح
يارب بس لما يجي يتجوز مايعذبش اللي يتجوزها
وربنا يرزقك ويرزق كل محتاج يارب
سلام عليكم
عجبني البوست دة في كلامك عن نفسك قوي
واحتياجك لاخ
فكرت كتير فية
ولاقيت نفسي كنت محتاجة زيك كدا
بس كنت محتاجة اخت
لان عندي اخ
وفكرت
لو في ناس عندها اخ بس مطلع عنيهم يبقي قلة احسن
وبعدها لاقيت بنات بردة بيغلثو علي بعض
قولت طيب الحمدلله علي لحال بتاعنا
لايكلف الله نفسا الا وسعها
ربنا كان عارف اني مش هستحمل اخ واخت كمان
ربنا يقدرني علي اخوية بس
اما بالنسبة اننك محتاجة اخ وحاسة ان النعمة دي مش عندك
فا انتي عندك نعمة كبيرة محدش حاسس بيها كتير
وهي باباكي ومامتك
زي ما انت قولت اللي بيقي معاه الحاجة مش بيحس بيها
في كتير غيرنا معندهمش وحاسس اننا في نعمة
واحنا مش حاسين بيها
وانا كنت بعيش القصة دي مع الاخت لحد ما عرفتك
حسيت اني لاقيت اختي اللي كنت بدور
عليها
واحكلها اي حاجة بتحصلي حتي لو تافه
الحمدلله
سلامممممممم
Today nobody if can forget:
جمال عبد الناصر,
15/1/1918/ - 28/9/1970
The Great, Gamal Abdel Nasser
David Santos
بصى يا نرمين
انا فاهم انتى قصدك ايه لانى بجد كان نفسى برده يكون ليا اخ ولد يعنى كان نفسلى يبقى صاحبى و اخويا فى نفس الوقت
عارفه لما بقعد فى الباكلونه بالليل كتير برده كنت بتمنى ان ابقى قاعد مع اخويا و احكيله و يحكيلى و نتخانق حتى بس يبقى فيه حد معاكى تبقى عارفه انه مهما حصل لو عرف انك فى مشكله هتلاقيه اول واحد بايع حتى نفسه علشان خاطرك
اما بالنسبه الكلمه اللى جرحت كرامتك انا مختلف معاكى فيها لانك لازم انتى اللى كنتتى تردى عليها و لازم انتى اللى تتعلمى انك تواجهى اى حد حتى لو كنتى لوحدك
لان هى ديه الدنيا يا بنتى
على العموم كل سنه و انتى طيبه و ما حدش عارف الخير كان هيبقى فين
تحياتى
على فكره انا بوستى نزل مستنى تعليقك بقى
موضوعك جميل جدا واحساس الاخ دا احساس جميل اوى على فكره اجمل حاجه انك قفلتى مرحلة الشات دى
تانى حاجه بقى موضوع الاخ دا انتى كان ممكن يكونى يكون ليك اخ يجبلك العار وممك كان يكون ليك اخ يشرفك بس فى كل الاحوال الخيره فى ما اختاره الله
موضوع الكلمه اللى انتى كاتبيها مالهاش دعوة لا باخ ولا ام ولا باخت دى
ثقافه خارجيه انتى اكتستيها بس الغلط منك انتى لان مش اى كلمه تقوليها كده قبل ما تعرفى معناه بيتهيالى فى ام ممكن الاول كنتى سالتيها وبعدين كتبتيها او لا
فى حاجه كمان بيتهيالى الكلمات الغلط بتكون واضحه زياده عن اللازم
على فكره انا عندى اخ ولد صغير فى تانيه ثانوى بس مربينا ماشاء الله ساعة ما يدخل البيت الكل يلتزم الصمت بس خايب فى الدراسه ادعوله ربنا معاه السنه دى
السلام عليكم
مبدايا كده يا جماعة...ميرسى جدا ليكو كلكوا على كلامكو ...بس على فكرة انا فى موضوع التعليق اللى جالى ...انا ماكنش هدفى من كتابته انكو تهاجموه...لانى انا فعلا غلطانة ..وهو عموما اعتذر عن كلامه اللى جرحنى والموضوع منهى كل الموضوع انى كنت متاثرة بس انى حطيت نفسى فى موقف زى ده
=================================
محمد
اهلا يا محمد ازيك ..كل سنة وانت طيب
فعلا يا محمد الموضوع بيختلف من اخ للتانى ..يعنى انا ممكن كان يكون عندى اخ واكره عيشتى معاه
ميرسى يا محمد لمرورك و كلامك
تحياتى
_________________________________
ابراهيم محسن
يا اهلا وسهلا بصاحب الخيال الجميل
كل سنة وانت طيب
بص كالعادة لازم تقول جملة ولا اتنين يفضلوا يرنوا فى ودن الواحد كتير
ومتضيعيش جمال الأشياء اللي بين اديكي
في رثاء أشياء لم تكن يوماً لك
جملة جامدة جامدة بجد يا ابراهيم و بتتردد فى ودنى
اما بالنسبة لتعليقك فى موضوع الصداقة بين الولد و البنت
انا شايفة ان طالما زى ما انت قلت الموضوع نسبى و شخصى بيختلف من انسان للتانى يبقى الموضوع مش مضمون
وبعدين كون انت حد محترم و بتراعى ربنا فى تعاملك مع الناس ده مايخلناش نعمم ده على بقية الشباب
وبعدين بالنسبة للمثل اللى انت ضربته بتاع صداقة الولد لاخوه او اخته او ابوه
مش ده يا ابراهيم المعنى اللى انا كنت بتكلم عليه...أنا فى اول البوست وضحت انا كلامى عن طرفين الصداقة اللى هو ولد و بنت مالهمش صلة ببعض
ميرسى اوى لمرورك يا ابراهيم و يا ريت دايما كده تشاركنى برأيك
تحياتى
________________________________
دوبا حبيبتى
كالعادة تعلقيك فى مسحة حنان وود بشكل فظيع...عاملة ايه يا دوبا ؟؟ كل سنة وانتى طيبة
بصى يا دوبا انا عارفة ان الحمد لله ربنا انعم عليا كتير
وعلى فكرة انا علاقتى مع بابا كويسة الحمد لله و بنهزر مع بعض كتير و بنقعد انا وهو صوتنا يعلى قدام ماتشات الاهلى كان اب و ابنه قاعدين يتفرجوا هههه و كمان بنحب نشوف مع بعض حاجات كتيرة و نعلق عليها...بس انا كان قصدى انو مايعرفش حاجة عن مشاكلى الشخصية ...يعنى كلامى معاه فى حاجات عامة ...ده كان قصدى....انا لما اتمنيت انى يكون ليا اخ ...انو يكون حد قريب من سنى و تفكيرى و انو عرف يحيتونى و اقدر احكيله اللى مش بقدر احكيه لبابا
تحياتى ليكى يا دوبا و احترامى
_____________________________
ورداية
ههههههههه شوفتى بقى انا بقرا افكارك ازاى ...اى خدمة يا فندم
كل سنة وانتى طيبة ...واهلا بيكى فى توهااااااااااان
بصى ادعى لاخوكى بالهداية ...هو برده صغير
ومصيره باذن الله يعقل و ساعتها يحس بالمسئولية
وربنا باذن الله يرزقه بالزوجة اللى تعرف تظبطه وقت اللزوم ههههههه
تحياتى
__________________________
my hopes
اهلا بالانتيييييخ
ياما قرفتك بالساعات على الماسنجر اشكيلك من موضوع الاخ ده:(
انتى اكتر حد فاهمنى وحاسس بيا فى الموضوع ده
بالنسبة لموضوع انى اختك ...احنا نطول يا باشا:ي :]
اموااااااااا
______________________________
david santos
hey david...how r u????thanx for remembering abd el nasar..
________________________________
شريف غريب
ازيك يا شريف...انت كمان بتشكى من موضوع الاخ ده....:( كسبت حد معايا اهو مقتنع اهمية وجود الاخ:]
بص ياشريف انا بحاول اكون قوية صدقنى و ادينى اهو واجهت نفسى و عملت الموضوعب بوست عشان اواجه نفسى وقلت انى قلت كلمة غلط و اعترفت ...يعنى اعتقد انى كده بردو واجهت...كون بقى ان الكلام وجعنى و جرحنى ده بجد مش بايدى غصب عنى
انا جاية اهو حالاااااا اقرى البوست
تحياتى
_________________________________
سندريلا
ازيك يا ساندى ...كل سنة وانتى طيبة
فعلا احسن حاجة انى قفلت حوار الشات ده
عندك حق انا بعد كده لازم ادقق شوية فى الكلام اللى بقوله مش اى حاجة شائعة اقولها حتى لو كانت بتتقال على لسان ولاد وبنات ..لازم اعرف معناها الاول
بالنسبة لاخوكى ...ربنا يحميه بجد...جميل اوى ان الواحد يكون عنده هيبة وشخصية من وهو صغير
وربنا ان شاء الله يكرمه و ينجحه فى حياتى
تحياتى ليكى
السلام عليكم ورحمة الله وبركاته
طب ما أنا أهو ماليش إخوات بنات وعايش عادي ربنا عايز كدة , لكن ليا أكتر من أخت على النت وانتي أكيد منهم والواحد مش بيحس أوي بالكلام ده , هو آه لما الواحد بيفكر وهو لوحده بيحس إنه كان الوضع ممكن يكون أحسن لو ليكي أخ ولد لكن مين عارف ممكن يكون لو ليكي أخ ولد هيطهقك في عيشتك برضه زي اخوة صاحباتك وترجعي تقولي ياريتني ما كان لي أخ
وأنا برضه ككان نفسي يبقى لي أخت لكن قدر الله وما شاء فعل ولكن لو كان لي أخت كنت هبقى قلقان عليها وبتعمل إيه وكدة مش تحكم ولكن خوف وأكيد محدش يعرف ولاد الزمن ده
مش ممكن يكون فيه واد غلس زيي كدة وعامل فيها لذيذ وعمال يتكلم في اللي مالوش فيه؟
شكراً على السؤال
جزاك الله خيراً
السلام عليكم
يهب لمن يشاء اناث ويهب لمن يشاء الذكور
ربنا له حكمه لكل شئ
مش عارف كلمة ايه اللي كتبتيها بس ان ملاحظتش اي حاجه تخرج عن حدود الادب واللياقه
واعتبريني زي اخوكي :P:P:
ههههههههههههههه
تحياتي
مش هقولك ان احنا كلنا اخوات لأننا مش اخوات الاخوات شئ و المعرفه شئ و هو ده الواقع بدون تجميل
انا بس في حاجه محيراني هي ايه الكلمه :))
ما علينا
صدقيتي ان الاخ ده شئ مش حلو خالص و هتعرفي انك في نعمة
الرجاله دول جنس لا يطاق دماغهم تجيب شلل و اشأليني انا
أنا كمان طول عمري كان نفسي يبقى ليا أخ أو أخت أكبر مني متفرقش
أي حد يشيل اسم الكبير عني و خلاص
اولا انا شايف ان عرضك لحاجه بتدور فى ذهنك وبتشغل تفكيرك خاصة مع كل اللى حكيتيه ضروره كبيره
امال يعنى التدوين فايدته ايه
ثانيا
مين قالك ان كل اللى لهم اخوات ولاد بتكون العلاقه بينهم زى ما فى خيالك كده
نسبه كبيره جدا العلاقه بينهم لا تتعدى انه يرخم عليها او يبين انه راجل ومسئول عنها
ده اذا اعتبرها فى البيت اساسا
والجانب الاخر البنات بتتخوف من موضوع انها تشرك اخوها او ابوها فى اى مشكله او ظرف بتمر بيه اما لخوفها من رد فعله او لانها اساسا مش متعوده على حاجه زى كده
وعامة رب اخ لك لم تلده امك
وان شاء الله العمليه تنجح وتبقى زى الفل
هنساعدك اوعى تقلقى
احمد
العزيزه نرمين
على فكره انا عندي أخوات بنات وأخوه بنين بس أنا أكتر قريب من أخواتي البنات وفعلا عارف اللي أنت تقصديه كويس ومش هقولك متزعليش من اللي علق التعليق ده لأن في ناس أتطوعوا وأقوللك ده بس هقولك
بليز ممكن تعتبريني أخوكي
بهزر طبعا عشان بس متمسكيش في الكلمه بس عايزك بجد تقتنعي بحاجه مهمه أن مهما كان تعاطف الاخر معاكي فأنتي في النهايه صاحبت المشكله وصاحبت وجهه النظر النهائيه فيها
ولو على النصح فأنا واثق أنك حواليك ألف أخ مش أخ واحد يتمنى بس أنك تعتبريه أخوكي
تحياتي
السلام عليكم صديقتي العزيزة احييكي علي شجعتك وتعبيرك عن اللي جواكي بس فعلا انتي ليكي اخوات ومدونتك دي وكل اللي بيعلقوا عليها اخواتك وسيبك من اللي بيخدوا موضوع الاخوات ده لاغراض معينه بس انك تحكي لنا ونسمعك ده اكيد بيدل ان ليكي اخوات بيهتموا بيكي
اولا انا اختلف مع اللي قالك كلام زعلك شكلا وموضوعا
انت من الناس المحترمه اللي اعتز بمعرفتهم وده مش كلام للاستهلاك
تانيا انا الحمد لله متابع المدونه بتاعتك من ايام بوست اذاعه القران الكريم ومن ساعتها مافوتش بوست وعلى ما اعتقد وانا ذاكرتي كويسه ان كل بوستاتك كانت من لاهميه والاحترام والموضوعيه انها تتقري وانا لو كنت لاحظت اي خروج ولو غير مقصود انا كنت اكيد هانبهك ليه عشان ضعاف النفوس مش ينتهزوا الفرصه لكن ده ماحصلش
ثالثا احساس الحنين لاخ او اخت ده مش بس للي ربنا منع عنهم الميزه دي لكن كام حد عنده اخوات وحاسس انه وحيد وكام واحد حاسس ان كل البلد اخواته المسأله معقده ونسبيه
وصدقيني اخوك اللي مش موجود ده هو الخسران انه مش عنده اخت زيك
تحياتي
طيب
واية المشكلة بس يا انسة نيرمين
انا كان نفسى يبقى عندى اختى بنت اكبر منى او ف سنى ع الاقل
برضة الواحد يخاف عليها
وكدة يعنى
لكن لاسف مفيش
وبعدين اهى ماشية وبتعدى
السلام عليكم اولا انا اول مره ادخل على المدونه ودخلتها بالصدفه كنت بدور على صور فى جوجل وهو الى جابنى على هنا
لاكن فعلا انا سعيد انا جيت ولاقيت البوست الجميل دا
فعلا لما بيكو ملكش اخ بتكون حاسس انك ملكش اى حد تكلمه بيكون احساس مش كويس
بيكون اجمل لو ليك اخوات لو حتى مكنتوش متفاهمين ممكن فى يوم تتفاهموا
حضرتك فكرتنى بنفسى انا المفروض الكبير كان ليا اخواتى البنات اكبر منى لاكن اكبر منى بسنين قليله يعنى عشنا حياتنا وطفولتنا مع بعضنا فعلا لما تفتكرها بتكون زكريات جميله جدا بتخليق عاوز تبكى انا فعلا لما بكون لوحدى كدا وافتكرها فعلا بافضل ابكى على الايام الحلوه الى متاكد فعلا انها مهترجعشى تانى خصوصا وانهم اتجوزوا خلاص وفعلا لما اخواتك البنات ب\يتجوزوا بتحس ان البيت فاضى خالص خالص كانه مفيهوش اى حياه حتى انا قبل ما يتجوزوا كان هوايتى ان انا افضل اعارب فيهم بتكون فعلا ايام جميله جميله جدا حتى اليوم الى هما بييجوا فيه البيت بكون مش عاوز اسيبه بيكون للبيت شكل تانى خالص
على النقيض تماما لى اخ اصغر منى بكتير اقل من 10 سنين بشويه لاكن هو على النقيض تماما مش متفاهم معاه خالص مش عارف ليه هو كتير بيحاول يقرب منى وبيعمل الى بقوله عليه لاكن مش عارف ليه انا ببعد عنه مع انه كويس احسن من غيره كتير هو فعلا مش ملتزم ومضيع شويه لاكن ممكن ينطبق عليه لفظ انه صغير لسه لاكن فعلا انا معايا اصحاب من ولى اعدادى ومع بعض دايما مهما حصل مع بعض حتى اصحابى الى عرفتهم فى الجماعه وبعد كدا مش زى اصحابى دول
لاكن فعلا لو الشخص اتفاهم مع شخص يكون رهم مع بعض وفاهمين كل حاجه عن شخصياتهم وايه الى بيزعلهم بيكون اجمل كتير
بانصحك انك يكون ليكى صديقه فعلا هتكونوا مع بعض اخوات لاكن انا باشعر ان صحبيه البنات مش دايمه لانهم لما يتجوزا كل واحده بتروح فى طريق وممكن ينسوا بعض لاكن انصحك انك يكون ليكى صديقه اعتبريها اختكط هى فعلا الى هتريح جامد
اسف على الاطاله وانا سعيد انى دخلت على بوست حضرتك
وانا مش عارف هقدر ادخل عليه تانى ولا لا اصل انا نساى اوى بنسى
Post a Comment