عدت سنة كاملة على المدونة بتاعتى
يااااه
الوقت بيجرى بسرعة يا ولاد:)
انا فاكرة اول حاجة معرفة ليا للتدوين كانت فى صيف 2006
لما قريت عن مدونة منال و علاء فى جرايد المعارضة
وكنت بدخل مبهورة بقى وفاتحة بؤى زى نفق شبرا
وااااااو
اخبار مظاهرات و ناس بتجادل فى بعضها
وبعدين ابتدى الواو ده و الانبهار يروحوا وابدا اتخنق
من الشتايم و التخبيط فى حاجات ماينفعش التخبيط فيها
وبعدين ابتديت اتشد للتعليقات اللى كانت محطوطة هناك..وادخل مدونات صحابها
بقيت بدخل على منال وعلاء بس عشان اخش على اللينكات دى..وجمعت فعلا لينكات المدونات عندى...وبقيت بتابعها على طول....الليل كله كنت بقضيه قراية...
شهوووور وانا شغالة قراية
وكانت البت my hopes صحبتى تكون قاعدة معايا على الماسنجر....وتلاقينى مخروسة مش بتكلم..تقولى بتهببى ايه
اقولها بهيم على وجهى فى المدونات
المهم فضلت على الحال ده
لحد اليوم الموعود اللى 3-6
كنت فى مدونة دماغى....بتاعة محمد حمدى
كان كاتب قصة حلوة اوى اوى
اسمها حدث فى محطة الرمل
وكان مقسمها على حلقات
واخر حلقت انا قرتها اليوم ده
ومن كتر اعجابى بالقصة ..خلانى اخد القرار اللى كنت باجله من ساعة مع ابتديت اتعلق بالمدونات
وقمت عاملة المدونة دى
ولما جيت بعملها
وقدام خانة الاسم...قعدت افكر كده شوية وبعدين
لاقيت نفسى بكتب توهان
لدرجة انى قعدت افكر ...انا ايه اللى خلانى اكتب كده...لتكون فى مدونة تانية اسمها كده ومعلقة فى دماغى..
بس مع الوقت عرفت ان توهان ده انسب تعبير يوصفنى
طبعا...كنت فى الاول داخلة متحمسة و كده
ولما كان بيجيلى تعليق بفرح اوى اوى اوى
انا فاكرة اول تعليق جالى انا هيجرالى حاجة..كنت عاملة زى فؤاد المهندس
الله يرحمه...لما المكنة طلعت قماش:ي
مع الوقت بقى ابتديت اكسل كالعادة
يلا بقى كفاية رغى كده عليكو
وكويس انكو استحملتونى لحد دلوقتى:)
يا ريت اللى يدخل ويقرا الكلام ده ويتكرم ويعلق....يكتب رايه فى المدونة ..
سواء حلو او وحش
مش بزعل....ولو كان متابعنى من الاول..يكتب اكتر بوست عجبه
واكتر بوست ماكنش عجبه
ده كان اول بوست ليا بالتعليق الوحيد اللى جالى
بسم الله الرحمن الرحيم و هنبدا الليلة :ي
طبعا بما ان انا بس اللى موجودة دلوقتى فى حفل افتتاح مدونتى الجديدة...فاحب اقول لنفسى الف الف مبروك يا نرمو (نرمو اللى هى انا )..وبما ان انا الحاضرة الوحيدة..فانا بتعهد قدام نفسى ان البلوج ده هيكون منبر (حلوة منبر دى:ي)لاى حد تايه ونفسه يلاقى حتة يتوه فيها اكتر..وبما اننا فى عصر الديموقراطية واهو خلاص على وشك العبور البوابة بتاعة المستقبل فاى حد نفسه يقول حاجة ...حتى لو كانت بتنتقدنى انا سخصيا:ي يقولها ورزقه على الله... بس اهم حاجة ان النقد مايتجاوزش حدود الادب يعنى من غير شتيمة (ضرب بس:ح)......هذا واقول قولى واستغفر الله لى ولكم و السلام عليكم ورحمة الله وبركاته
"تصفيق حاد"
اصرار أمل said...
نورت التدوين ...... والنت كله يانرمين ......نأمل أن نرى قريبا ابداعا......مبروك ؛ وربنا يجعلها فى ميزان حسناتك .........
March 8, 2007 1:43 AM
نورت التدوين ...... والنت كله يانرمين ......نأمل أن نرى قريبا ابداعا......مبروك ؛ وربنا يجعلها فى ميزان حسناتك .........
March 8, 2007 1:43 AM
16 comments:
عزيزتى
الف مبروك يا جميل ونبقا نحتفل بيه مع بعض ايه رائيك
مدونتك جميلة
مع انى مقصر شويه فى وجودى هنا
لاكن احلا شئ فى اى مدونه الصراحه والوضوح
ورائيك فى التعليقات يكون دايمن حاسم وواضح مفهوش نفاق ولا خوع من زعل حد
ربنا يكبر دونتك ويخليها احلا بيكى
ونحتفل مع بعض السنه الجيه بمدونتنا
تحياتى
سلام
كل سنة ومدونتك اكثر تالقا واكثر افكار واكثر تعليقات
تحياتي الخالصة
كل سنة وانتى طيبة يانرمو ، بجد حكاية مدونتك لذيذة اووووى ،وعقبال يارب مليوووون سنة تدوين
مبروك سنة أولى تدوين يا نرمو
انتي كدة أكبر مني ب 4 شهور
عشان كدة بعتبرك مثلي الاعلى
طبعا اللي فاتت دي اي كلام
بس مقدرش انكر ان عندك نوع من الملكة في الكتابة لازم يجذبني اني اجي اشوف موضوعك الجديد
---------
اكتر موضوع عجبني كان اور مرة ادخل عندك و اقراه بتاع الحرامية و النصابين---افتكرتي؟
كل سنة و انتي طيبة
بس الموضوع هيبقى حاف كدة ولا ايه!؟
ههههههههههه
إزيك يا نرمو؟؟
أنا عرفت مدونتك من منمن
وانت برضه عسولة زيها
ومن أول بوست شكلها مدونة جاااااامدة
وكل سنة وانت طيب وعقبال 35265656565سنة للمدونة
كل سنة وانتي طيبة يا مدونتي
عقبال مليون سنة
وان شاء الله تكتبي احسن واحسن واحسن
ومبروك للاهلي كمان
أول مرة أسمع إن منال و علاء دول عملو حاجة كويسة في حياتهم
:d
كل سنة و انتي طيبة
عدت سنه
انا عرفت بلوجك بعد مابدأ بفترة صغيرة
تحديدا ف بوست عن اذاعة القران الكريم
ومن ساعتها مواظب او بمعنى ادق كلما سنحت ليا الظروف
اهم حاجه من وجهه نظري لازم تغيريها ف التدوين المسافات الزمنيه الكبيره اللي بتفصل كل بوست عن اللي بعده
غير كده البلوج بتاعك يستاهل اننا ننتظر الفترات الطويله دي علشان اللي بيتكتب بيبقى يستحق الانتظار
هو علشان كده كل بوستاتك طويله
بتعوضينا بطريقه غير مباشرة مثلا ؟
عقبال 5 سنين تدوين
اعتقد لو حد مننا وصلهم يبقى ده انجاااااااااااااااااز
تحياتي ليكي ولصاحبتك
كل سنة و انتى طيبة يا نيرمو
و عقبال السنة الجاية يا باشا
كل سنة و مدونتك طيبة يا نرمو
و عقبال عيد ميلادها المليووووووووون
ان شاء الله
اولز يارة لمدونتك بس ان شاء الله مش الأخيرة
ربنا يوفقك
تحياتي
كل سنه وانت ظيبه والسنه الجايه تبقي مدونتك ربنا رزقها بابن الحلال حت لو موقع كدا ويقعدها في حتة شبكه محصلتش يلا عقبالنا كلنا. اه انا مخدتش جاتوه اجي بكره طيب؟
يللا، كل سنة و انتي طيبة و عقبال اليوبيل الخشبي، مدونتك بتعجبني لأن موضوعاتها مفيدة و محددة و بتبقى عادة واضحة المعالم بالإضافة إلى إنها بتكون طويلة و انا بصراحة بحب المواضيع الطويلة اللي فيها شرح مستفيض و أفكار جديدة و يا ريت تستمري كدة و ما تقعيش ف الفخ الغبي اللي اسمه التكرار و السطحية
المشكلة الوحيدة من وجهة نظري هيا أسلوب الكتابة نفسه لأن بلاحظ إنك ما بتهتميش كتير بتنقية التعبيرات و اللغة، صح إنو الكلام لما بيطلع بسرعة و من غير تصفية بيكون أصدق ف التعبير عن الحالة غالباً لكن بردو اللغة مهمة لأنها بتفرق كتير لما أدخل مدونة صاحبها كلامه مترابط و ماسك ف بعضو و السيكوانس بتاع الموضوع سلس غير عن لما أقرأ تدوينة خبط شمال و يمين و فوق و تحت رغم إنه لا أخفي عليكي غني مرات بحب القراءة الفوضوية دي و مرات بدخل عند ناس عشان بس أستمتع بالفوضى دي لكن أنا بقولك الكلام دة اعتمادا على اللي أغلب الناس بتفضله
تمام يا افندم؟
عقبال اليوبيل النحاسي
هو عيد الميلاد مش ناوي يخلص ايه مفيش مواضيع جديدة ولا ايه
تحياتي
بت
انتي فين؟؟
انتي اختفيتي تاني فين
الف الف الف الف مبروك يا نرمو معبال مليون سنه لمدونتك الجميلة دى
تحيــــــــ يا نرمو ـــــــــاتى
Post a Comment