أن تكون نصـــــاب او حرامى ...تلك هى المسألة

فى القانون

على أساس انى هبقى متر أد الدنيا

ان شاء الله :ي

فى فرق بين النصب و السرقة وخيانة الامانة

طبعا ممكن عند العامة أمثالكوا :P مايعرفوش الفرق بين الكلمات التلاتة

شوفتونى وانا تنكة :ي

السرقة

يعنى اخد حاجة مملوكة للغير من غير علمه ولا رضاه

اما خيانة الامانة

فدى ان حد مثلا يسيب عندك حاجة..او يديك حيازة شىء بتاعه

بس مش بنية انه يخليها ملكك ..وانت لمو آخذة تضرب عليها وتقوله مالكش حاجة عندى بعد كده

اما بقى النصب :ى

وده هيكون موضوع حلقتنا النهاردة

فده حوار تانى خالصصصص

اصل اختكو يا جماعة اتلدعت كذا مرة

مش معنى كده انى من أثرياء نيويورك يعنى

بس انا بتكلم على اساس انى لسه فى كلية ولسه باخد مصروف اتنصب عليا كذا مرة كده

اومال لما اشتغل ان شاء الله و يكون معايا فلوس ..هيتنصب عليا ازااااااااى

مش عارفة بقى هو انا اللى هابلة وبصدق بسرعة ولا حظى اللى وقعنى فى ناس عجيبة

ده انا عار على مهنة المحاماة:(

عشان كده انا جاية النهاردة انقلكوا خبرتى فى الموضوع ده(h) بس

بدل ما اقعد اقولكوا ماتعلموش كدا و كدا هقولكوا مواصفات النصاب المحترف

مبدأيا كده عايزة البنات تركز معايا

لاننا معشر البنات عموما سهل نتثبت بسهولة واى حاجة ممكن تثير شفقتنا

ما علينا

ركزوا معايا بقى

فى القانون و كلامه الرخم بيقولك ان فيه مظاهر خارجية للطريق الاحتيالية وهى

أ-اصطناع الجانى لبعض الوقائع المادية

ب-الاستعانة بشخص آخر يدعم مزاعم الجانى

ج-استعانة الجانى بأشياء معينة

د-استغلال الجانى لصفته أو مركزه أو الثقة الموضوعة فيه

سيبكوا بقى من الكلام الحمضان ده

وركزوا بقى معايا فى كلام

أهل العلم(اللى هو أنا) وأسال مجرب

ولا تسألش دكتور الجنائى

بصوا بقى

مواصفــــــــــــــات النصــــــــــــاب

1

انك تكون لذيذ او لذيذة

تكون جذاب فى كلامك و بسيط وطيب

بحيث ماتديش اى شعور للى ادامك انك ممكن تسرق لبانة

2

استخدام الدين كساتر ليك حاجة مش محتاجة قوالة

اكيد انت النهاردة صايم

طب صايم ليه ده النهاردة 2رجب مش واحد رجب ومش يوم اتنين ولا خميس

انت كده بتحب تصوم اول اسبوع فى رجب

3

دايما حاول تتطعم حكاويك عن المواقف الجنتلة اللى انت عملتها قبل كده مع الناس و المساعدات اللى بالهبل

وانك جيت متأخر عن معادك عشان كنت فى دار الايتام الفلانى ودايما تختم كلامك

يلا بقى الواحد مش بيحب يقول هو بيعمل ايه

4

مش محتاجة اقول ان يوم الجمعة دايما مش هينفع تخرج فيه مع اى حد عشان هو محجوز.

لانك هتقضيه مع الايتام او المسنين

ومفيش مانع وانت مثلا بتفتح المحفظة بتاعتك عشان تجيب منها حاجة..توريلو الكارنيه بتاع الاشتراك الدورى بتاع التبرع بالدم طبعا ده صدفة ليس الا ..والشىء بالشىء يذكر

5

بين ان دايما اللى فى ايدك لغيرك ..وانك لولا الخير الكتير اللى بتعمله كنت بقيت حاجة تانية خالصصصص كنت هتبقى مليونير وانك ابن ناس وبتاع وانهم فى البيت مش راضيين عن افعالك دى وانهم شايفين انك اهبل وكريم زيادة عن اللزوم وانهم قرروا يحرموك من الميراث..وطبعا لازم تحسس اللى قدامك انه بخيل وأنانى اوى

اذا قارن نفسه بيك

6
سيب بقى خيالك الحلو يبدع ..والف مشاكل و حواديت (مش محتاجة اقول انها مادية)

وطبعا انت بتحكى الكلام ده على سبيل الفضفضة ليس الا

هعمل اللى عليا بردو عشان اكون خلصت ذمتى

واديكو شوية افكار مساعدة

مثلا

لو انت طالب ولا حاجة

انك ماعكش فلوس عشان تجيب ملازم و كتب و ورق تمتنحن فيه

لو انتى بنت

قولى مثلا انك مندوبة فى شركة اوريفليم او ايفون

وانك كنتى بتشترى حاجات بطريقة الدفع الاجل

و بعدين الموظفين بتوع القسم قرروا يطفشوا من الشغل و عايزين يفقلوا الحساب قبل ما يمشوا

وانك مزنوقة ...وهى ازمة و هترجعى الفلوس اخر الشهر

ابقى قابلينى بقى لو اخر الشهر جه

او مثلا انك واحد بتشتغل

وواحد من اللى كانوا معاك وتحت مسئوليتك سرقوا حاجة وانت المسئول بتسديد قيمة الحاجة

وطبعا لحظك الوحش ..مش معاك فلوس وقتها

ويا الدفع يا الحبس

على راى فهيم أفندى فى مسلسل لن أعيش فى جلباب أبى

7

طبعا يا ريت تخلى حد ،طرف تالت يعنى... يكون تبعك أكيد ...يجى يأكد انك فعلا بنى آدم كويس ويحكى عن الكام موقف جدعنة اللى عملتهم معاه

ومعلش يا عم بدل ما تبقى القسمة على واحد تبقى الاسمى على اتنين

8

طبعا وشك هيجيب 300 لون اول ما اللى ادامك يعرض المساعدة

وتقوم متنرفز و ياسلام لو تزعق

ازاى اازاىىىىىىىىىى

ماكنتش اعرف انك ممكن هتفهم فضفضتى كده

9

ودى بقى حاجة بقولها للى عايز يحترف النصب مش شغل هواه يعنى

لو مثلا عايز تنصب على حد فى مشروع وهمى او حاجة مالهاش وجود

خلى الفكرة تطلع من بؤ اللى قدامك

مش ممكن هيشك فيك لحظةةة

ودى بقى اعلى درجات الذكاء و الحرفنة فى النصب

واعتقد ان انجح عمليات النصب اللى بتحصل

بيكون اللى اتنصب عليهم هما صحاب الفكرة نفسها

يلا بقى انا عملت اللى عليا..ونقلتلكوا كل المواقف سواء اللى مريت بيها او غيرى من اللى اعرفهم مر بياه

******************************************

ملحوظة يا جماعة

طبعا بعيدا عن الهزار...فى ناس بتكون محتاجة بجد

بس مع الاسف يمكن انا لسه مش عندى الخبرة انى اعرف اميز الى قدامى

وبقيت اتعامل بمبدأ الناس مدانة حتى يثبت العكس

اكيد فى ناس كويسة وبتعمل خير كتييييير و بتتبرع بالدم و بيعرفوا ربنا سبحانه وتعالى

انا كان كلامى كله غرضه

هو

خدوا بالكووووووووووووووووووووووووو